Goa News: वर्ना, मार्गो आणि बोग्मालो; नावांची लावली पुरती वाट

Goa News: दाबोळी राष्ट्रीय महामार्गावरील मुख्य नाक्यावर बसवण्यात आलेल्या कमानीवरील नामफलकावर लिहिलेली गावांची नावे चुकीच्या पद्धतीने लिहिलेली आहेत. तीन वर्षांपूर्वी बसविण्यात आलेल्या या कमानीवरील या नावांची अजून दुरुस्ती होत नसल्याबद्दल नागरिकांनी संताप व्‍यक्त केला आहे.

यात वेर्णाचे वर्ना, मडगावचे मार्गो, बोगमाळोचे बोग्मालो असे नामकरण करून अर्थाचा अनर्थ केला आहे. वरुणापुरी ते वेर्णा हा राष्ट्रीय महामार्ग होऊन आता कित्येक वर्षे झाली. नंतर ज्या ज्या ठिकाणी मुख्य नाके आहेत, तेथे मोठ्या कमानी उभारून त्यावर नामफलक लावण्यात आले.

यात दाबोळी मुख्य नाक्यावर उभारण्यात आलेल्या तीन रस्त्यांवरील नामफलक वेर्णा, मडगाव तसेच बोगमाळो गावाचा दिशादर्शक दाखवतो. इंग्रजीतून लिहिताना या गावांचा उल्लेख बरोबर केला आहे. मात्र मराठीतून चुकीची नावे लिहिली आहेत.

त्यामुळे नाराजी व्यक्त करण्यात येत आहे. दरम्यान, आज मंगळवारी या नाक्याजवळ उड्डाणपुलाचे उद्घाटन झाले. यावेळी शेकडो नागरिक तेथे जमले होते. त्यांच्या नजरेस नामफलक पडले असता त्यांनीही नाराजी व्यक्त केली.