Goa Sports: शालेय क्रिकेट स्पर्धेत 'जीसीए'ची दमछाक! राज्यस्तरीय अंतिम लढती प्रलंबित

पणजी: गोवा क्रिकेट असोसिएशनची (जीसीए) २०२५-२६ मधील १४ वर्षांखालील आणि १६ वर्षांखालील आंतरशालेय क्रिकेट स्पर्धा घेताना दमछाक झाली असून जून महिना सुरू होऊनही मागील वेळच्या या दोन्ही स्पर्धा पूर्ण करण्यास संघटनेला अपयश आले. त्यामुळे शालेय स्पर्धांचा उद्देश पूर्णपणे फसल्याचे स्पष्ट झाले आहे.

जीसीएची उत्तर विभागीय १४ वर्षांखालील अध्यक्षीय करंडक व १६ वर्षांखालील दिलीप सरदेसाई करंडक स्पर्धा ३० मे रोजी संपली. त्यापूर्वी एप्रिल महिन्याच्या अखेरच्या आठवड्यात दक्षिण विभागीय स्पर्धा झाली होती. दोन्ही विभागांतील विजेते संघ राज्य अजिंक्यपदासाठी खेळणार आहेत, पण जीसीएला १४ वर्षांखालील व १६ वर्षांखालील राज्य अंतिम लढतीसाठी अजून दिवस व मैदान सापडलेले नाही.

त्यामुळे स्पर्धा पूर्ण होण्याबाबत संभ्रामावस्था आहे. २०२६-२७ शैक्षणिक वर्ष ६ जून रोजी सुरू होत आहे, परंतु जीसीएच्या मागील शैक्षणिक वर्षातील स्पर्धाच अपूर्ण आहेत. त्यातच सध्या अधूनमधून पाऊस पडत असल्यामुळे राज्यस्तरीय अंतिम लढती कधी आणि कशा होणार याबाबत स्पष्टता नाही.

यासंबंधी ‘जीसीए’कडून कारण जाणून घेतले असता, विद्यार्थ्यांच्या परीक्षा, नंतर उन्हाळी सुट्टी यामुळे शालेय स्पर्धांचे वेळापत्रक विस्कळीत झाले. संबंधित शाळांच्या शिक्षकांकडूनही वेळोवेळी सबबी देण्यात आल्यामुळेही स्पर्धेचे वेळापत्रक कोलमडले. साहजिकच स्पर्धा वेळेत पूर्ण करणे शक्य झाले नसल्याचे संघटनेने मान्य केले.