Goa Container Fire: दारूने भरलेल्या कंटेनरला भीषण आग, धारगळ महामार्गावर थरार; अग्निशमन दलाच्या वेगवान कारवाईमुळे 'अनर्थ टळला'

Dargal Highway Accident: गोव्यातील कळंगुट-म्हापसा महामार्गावर मंगळवारी (१७ जून) सकाळी एक थरारक घटना घडली. महाखाजन, धारगळजवळ दारूच्या बाटल्यांनी भरलेल्या एका कंटेनर ट्रकला अचानक भीषण आग लागली. ही आग इतकी वेगाने पसरली की काही वेळातच संपूर्ण ट्रक आगीच्या भक्ष्यस्थानी पडला, ज्यामुळे परिसरात एकच खळबळ उडाली.

अग्निशमन दलाची धावपळ आणि वेगवान कार्यवाही

म्हापसा अग्निशमन दलाचे उपाधिकारी प्रशांत धारगळकर यांनी दिलेल्या माहितीनुसार, सकाळी ७:४५ च्या सुमारास महाखाजन, धारगळ येथे कंटेनरला आग लागल्याची माहिती त्यांना मिळाली.

विशेष म्हणजे, माहिती मिळताच अवघ्या आठ मिनिटांच्या आत अग्निशमन दलाचे बचाव पथक घटनास्थळी दाखल झाले.

आगीची तीव्रता आणि कंटेनर दारूने भरलेला असल्याने परिस्थिती गंभीर होती. मात्र, अग्निशमन दलाच्या जवानांनी अत्यंत वेगाने आणि कौशल्याने कार्यवाही करत आगीवर नियंत्रण मिळवले आणि काही वेळातच आगीच्या मोठ्या ज्वाळा विझवण्यात यश मिळवले.

आगीचे कारण आणि पुढील तपास

या घटनेत कंटेनर ट्रकचे मोठे नुकसान झाले आहे. आगीवर ताबा मिळवल्यानंतर अग्निशमन दलाने तात्काळ पोलिसांना घटनेची माहिती दिली. सध्या पोलीस या आगीच्या नेमक्या कारणाचा शोध घेत आहेत.

कंटेनरमध्ये दारू असल्यामुळे आगीने त्वरित पेट घेतला असावा, मात्र यामागे काही तांत्रिक बिघाड होता की अन्य काही कारण, याचा पोलीस सखोल तपास करत आहेत. आणखी तपशील हाती येणं बाकी असून, लवकरच या घटनेमागील कारण स्पष्ट होण्याची शक्यता आहे. अग्निशमन दलाच्या तत्परतेमुळे मोठी दुर्घटना टळली असं म्हणावं लागेल.