MPT Expansion Controversy: मुरगाव पोर्ट ट्रस्ट (MPT) च्या विस्तारीकरण प्रकल्पावरुन आणि राज्यातील कोळसा वाहतुकीवरुन सध्या राजकारण चांगलेच तापले आहे. या वादात आता गोवा प्रदेश काँग्रेस समितीचे अध्यक्ष अमित पाटकर यांनी भाजप सरकारमधील मंत्री सुदिन ढवळीकर यांच्यावर थेट आरोप केले आहेत. पाटकर यांनी ढवळीकर यांच्यावर लोकांची दिशाभूल करत असल्याचा आरोप करत त्यांना काँग्रेस सरकारने सादर केलेला कथित DPR (Detailed Project Report) जनतेसमोर आणण्याचे आव्हान दिले आहे.
पाटकर यांनी आपल्या निवेदनात म्हटले की, सुदिन ढवळीकर लोकांमध्ये अशी चुकीची माहिती पसरवत आहेत की, 2007 ते 2012 या काँग्रेस सरकारच्या कार्यकाळात मुरगाव बंदर विस्तारीकरणासाठी डीपीआर सादर करण्यात आला होता. मात्र, ढवळीकर करत असलेले हे आरोप पूर्णपणे निराधार आहेत.
पाटकर यांनी ढवळीकर यांच्या दाव्यावर जोरदार पलटवार केला. ते म्हणाले, “सुदिन ढवळीकर कदाचित विसरले असतील की ज्या काँग्रेस सरकारच्या कार्यकाळाबद्दल ते बोलत आहेत, त्याच सरकारमध्ये ते स्वतः मंत्री म्हणून काम करत होते. तेव्हाच्या मंत्रिमंडळाने मुरगाव पोर्ट ट्रस्ट (MPT) च्या विस्ताराला आणि गोव्यातून कोळसा वाहतुकीला ठामपणे विरोध केला होता.”
पाटकर यांनी ढवळीकर यांना थेट आव्हान दिले की, 'जर त्यांच्याकडे काँग्रेस सरकारने सादर केलेला असा कोणताही डीपीआर असेल, तर त्यांनी तो त्वरित लोकांसमोर आणावा.' पाटकर यांच्या या आव्हानामुळे या प्रकरणाला आता एक नवीन राजकीय वळण मिळाले आहे.
आपल्या पक्षाची भूमिका स्पष्ट करताना अमित पाटकर (Amit Patkar) यांनी सांगितले की, काँग्रेस पक्षाने कधीही गोव्यातून कोळसा वाहतूक किंवा MPT च्या विस्तारीकरणाला समर्थन दिलेले नाही. ते म्हणाले, “आमच्या सरकारने नेहमीच गोव्याच्या पर्यावरण आणि अस्मितेला प्राधान्य दिले आहे. गोमंतकीयांच्या संमतीशिवाय गोव्यावर कोणताही प्रकल्प लादला जाऊ नये, अशी आमची नेहमीच भूमिका राहिली आहे.”
काँग्रेस पक्ष गोव्याच्या परंपरा, संस्कृती आणि पर्यावरणाचे रक्षण करण्यासाठी तसेच गोमंतकीयांच्या हितासाठी कटिबद्ध आहे, असेही पाटकर यांनी ठामपणे सांगितले. ते म्हणाले की, मुरगाव पोर्ट ट्रस्टचा विस्तार केवळ आणि केवळ कोळसा वाहतुकीसाठी होता आणि तो गोव्याच्या पर्यावरणासाठी एक गंभीर धोका निर्माण करणारा प्रकल्प होता, म्हणूनच काँग्रेसने त्याला विरोध केला होता.
पाटकर यांनी भाजपवरही (BJP) जोरदार टीका केली. ते म्हणाले, “भाजप हा एक दांभिक पक्ष आहे. सतत नवीन जुमलेबाजी करुन गोमंतकीयांची दिशाभूल करण्याचे काम भाजप करत आहे. MPT विस्तार आणि कोळसा वाहतुकीवर त्यांची दुहेरी भूमिका आता उघड झाली आहे.” एका बाजूला भाजप नेते पर्यावरणाच्या रक्षणाची भाषा करतात, तर दुसरीकडे ते असे प्रकल्प पुढे रेटण्याचा प्रयत्न करतात, अशी टीकाही पाटकर यांनी केली.
पाटकर यांनी आरोप केला की, भाजप सरकार लोकांचा विरोध दाबून हे प्रकल्प पूर्ण करण्याचा प्रयत्न करत आहे. मात्र, काँग्रेस पक्ष गोमंतकीयांसोबत खांद्याला खांदा लावून उभा राहील आणि गोव्याचे पर्यावरण, अस्मिता व भावी पिढ्यांचे रक्षण करेल, अशी ग्वाही त्यांनी दिली.
या सर्व वादामुळे गोव्यातील राजकीय वातावरण अधिक तापले आहे. सुदिन ढवळीकर यांच्याकडून यावर काय प्रतिक्रिया येते, हे पाहणे महत्त्वाचे ठरेल. मात्र, MPT विस्तार आणि कोळसा वाहतुकीचा मुद्दा पुन्हा एकदा गोव्याच्या राजकारणात केंद्रस्थानी आला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.