Goa Coconut Price: गोमंतकीयांसाठी खुशखबर! वर्षभराच्या महागाईनंतर ‘नारळ’ झाला स्वस्त; नागरिकांना दिलासा

डिचोली: वर्षभरापासून ‘भाव’ खात असलेला नारळ आता काहीसा स्वस्त झाला आहे. दैनंदिन आहारातील महत्त्वाचा घटक तसेच प्रत्येक धार्मिक तसेच शुभकार्यांत अनन्यसाधारण महत्त्व असलेल्या नारळाच्या किमतीत ५ ते १० रुपयांनी घट झाली आहे.

गेल्‍या गणेश चतुर्थीच्या काळात नारळांचे दर मोठ्या प्रमाणात वाढले होते. ग्राहकांच्या कपाळावर आठ्या पडत होत्या. स्वयंपाकघरात नारळाचा वापर करताना गृहिणींनाही विचार करावा लागत होता. वाढलेल्या किमतीमुळे नारळाचा वापर मर्यादित स्‍वरूपात करावा लागत होता.

मागणी वाढलेली असतानाच नारळ उत्पादनात मोठी घट झाल्याने दर गगनाला भिडले होते. तसेच नारळ उत्पादनात सुमारे ४० टक्क्यांची घट नोंदवली गेली होती. चतुर्थीच्या काळात डिचोली बाजारात नारळांच्या दरात प्रतिनग १० ते १५ रुपयांनी वाढ झाली होती. मोठ्या आकाराच्या नारळांचे दर ७० ते ८० रुपयांपर्यंत तर मध्यम आकाराचे नारळ ४० ते ६० रुपयांपर्यंत पोहोचले होते.

दराबाबत..

गणेश चतुर्थीवेळी : मोठे नारळ ७० ते ८० रुपये प्रतिनग. मध्यम नारळ ४० ते ६० रुपये. सध्याचे दर : आकारानुसार दरात ५ ते १० रुपये कमी.

दर घटण्याची कारणे : यंदा नारळांचा ‘पाडा’ समाधानकारक. बाजारात वाढलेली आवक. पुरवठा सुरळीत.