Dhangar Community: धनगर समाजातील नागरिकांना अर्थसाहाय्य, पाणी बिलात सवलत; आमदार आर्लेकर यांच्या प्रयत्नांना यश

पेडणे: निवडणूकपूर्व आश्वासन पाळताना पेडणे मतदारसंघाचे आमदार प्रवीण आर्लेकर यांच्या प्रयत्नाने मोपा विमानतळामुळे स्थलांतरित व्हावे लागलेल्या धनगर समाजातील नागरिकांना मुख्यमंत्र्यांमार्फत आर्थिक साहाय्य व ओटीएस अंतर्गत पाण्याच्या बिलात सवलत देण्यात आली.

मुख्यमंत्री डॉ. प्रमोद सावंत व आमदार प्रवीण आर्लेकर यांच्या उपस्थितीत मोपा विमानतळ पुनर्वसन प्रकल्पांतर्गत येणाऱ्या धनगर समाजातील गंगू लखू वरक, मंदा पाडू वरक, विठू राया वरक, चिमणी ढाकू वरक, सावित्री जानू वरक, चंगू सिधू वरक, सोनू विठू वरक, गीता गंगाराम खरावत, धाकू भागो वरक, सिद्धु बाबू वरक व सोनू राया वरक यांना नागरी विमान वाहतूक संचालनालयातर्फे प्रत्येकी पाच लाख रुपयांचे घर दुरुस्तीसाठी आर्थिक साहाय्य व ओटीएस अंतर्गत पाण्याच्या बिलात सवलत देण्यात आली.

आमदार प्रवीण आर्लेकर यांनी यावेळी मुख्यमंत्री डॉ. प्रमोद सावंत यांच्या अंत्योदय तत्त्वाचे कौतुक करून पेडण्याच्या सर्वांगीण विकासासाठी सहकार्य केल्याबद्दल आभार मानले.