Goa CM Pramod Sawant: कर्नाटकात लय जबरा फसले सीएम सावंत; अचानक हॉटेलची लिफ्ट बंद झाल्यानं उडाली भांबेरी

Lok Sabha Elections 2024: आगामी लोकसभा निवडणुकीसाठी सर्वच राजकीय पक्षांनी जोरदार तयारी सुरु केली आहे. पंतप्रधान नरेंद्र मोदी यांच्या नेतृत्वाखाली भाजपने पुन्हा एकदा सत्तेत येण्यासाठी आपली सर्व शक्ती पणाला लावली आहे. याचदरम्यान, राज्याचे (गोवा) मुख्यमंत्री प्रमोद सावंत यांचा एक व्हिडिओ सोशल मीडियावर तूफान व्हायरल होत आहे. ज्यामध्ये ते लिफ्टमध्ये फसल्याचे दिसत आहेत. अचानक लिफ्ट बंद झाल्याने ते अडकले असल्याचे सांगितले जात आहे.

दरम्यान, मुख्यमंत्री प्रमोद सावंत कर्नाटक दौऱ्यावर असताना त्यांच्यावर हा प्रसंग ओढावला. मुख्यमंत्री सावंत कर्नाटकातील मंड्या येथील हॉटेलमध्ये मुक्कामाला असताना ही घटना घडली. यानंतर हॉटेलच्या कर्मचाऱ्यांनी तात्काळ त्यांना लिफ्टमधून बाहेर काढले. मुख्यमंत्री प्रमोद सावंत कर्नाटकातील भाजप-जेडीएस युतीचे उमेदवार एच. डी. कुमारस्वामी यांचा अर्ज भरण्यासाठी गेले होते.

लोकसभेच्या पहिल्या टप्प्यासाठी येत्या 19 एप्रिल रोजी मतदान होत आहे. यासाठी आज (दि.04) अर्ज दाखल करण्याचा अंतिम दिवस आहे. कर्नाटकात 28 जागांसाठी दुसऱ्या आणि तिसऱ्या टप्प्यात मतदान होणार आहे. दरम्यान, उमेदवारी अर्ज दाखल करण्याची लगबग सुरु झाली असून, कर्नाटकातील भाजप-जेडीएस युतीचे उमेदवार एच. डी. कुमारस्वामी यांनी मंड्या मंतदारसंघातून उमेदवारी अर्ज दाखल केला. यावेळी त्यांच्यासोबत गोव्याचे मुख्यमंत्री डॉ. प्रमोद सावंत, कर्नाटकचे माजी मुख्यमंत्री बी. एस, येडियुरप्पा आणि तेजस्वी सूर्या हजर होते. मुख्यमंत्री सावंत यांनी ट्विट करत याबाबत माहिती दिली. पंतप्रधान नरेंद्र मोदी आणि माजी पंतप्रधान एडी देवेगौडा यांच्या मार्गदर्शनाखाली भाजप कर्नाटकमध्ये सर्व 28 जागा जिंकेल असा, विश्वास मुख्यमंत्री सावंत यांनी यावेळी व्यक्त केला.

मुख्यमंत्री प्रमोद सावंत आज (दि.04) सकाळी कर्नाटकमध्ये दाखल झाले. यावेळी त्यांचे बंगळुरुचे खासदार तेजस्वी सूर्या यांनी स्वागत केले. सावंत यांनी तेजस्वी सूर्या यांच्यासोबत डोश्यावर ताव मारला. याचे फोटो देखील सावंत यांनी शेअर केले आहेत. कर्नाटकमध्ये 28 जागांसाठी दोन टप्प्यात मतदान होणार आहे. 26 एप्रिल रोजी राज्यातील विविध मतदारसंघासाठी मतदान होईल तर, सात मे रोजी उरलेल्या मतदारसंघासाठी मतदान होणार आहे.