CM Pramod Sawant: कुत्र्यापेक्षा गायी पाळा! घरी गायी पाळण्यासाठी सरकार आर्थिक बळ देणार; मुख्यमंत्र्यांची घोषणा

साखळी: गायी घरी पाळण्यासाठी सरकार आर्थिक बळ देणार आहे. एका घरात किमान पाच देशी गायी असल्यास त्या घराला दरदिवशी सरकार प्रत्येक गायीप्रमाणे रू. ८० देणार आहे, अशी घोषणा मुख्यमंत्री डॉ. प्रमोद सावंत यांनी साखळी येथे केली.

या योजनेची अधिसूचना लवकरच काढली जाणार आहे. घरात आता एखादा प्राणी पाळायचाच असल्यास कुत्र्यापेक्षा गायी पाळा, असा सल्ला मुख्यमंत्री डॉ. प्रमोद सावंत यांनी यावेळी दिला.

विश्व हिंदू परिषदेला ६० वर्षे होत असल्याने विश्व हिंदू संमेलनाचे आयोजन साखळीतील श्री राधाकृष्ण मुरलीधर संस्थानच्या सभागृहात करण्यात आले आहे. या संमेलनात मुख्यमंत्री बोलत होते. यावेळी व्यासपीठावर विश्व हिंदू परिषदेचे विभाग प्रमुख संजय नाईक, साखळीचे प्रमुख संतोष भगत, साखळी भाजप मंडळ अध्यक्ष गोपाळ सुर्लकर, उपनगराध्यक्ष आनंद काणेकर, भानुदास जोशी, राधाकृष्ण मुरलीधर संस्थानचे अध्यक्ष राजदत्त मापारी व इतरांची उपस्थिती होती.

ते कळणारही नाही!

हिंदू कधी अल्पसंख्याक होईल हे कळणारही नाही, म्हणून विश्व हिंदू परिषदेचे काम करावे. देशात सर्वधर्मीयांचे काम सुरू आहे. ते करण्याची मुभाही येथे आहे. त्याचा कधी द्वेष होत नाही. सर्वांना स्वातंत्र्य आहे. गोव्यात समान नागरी कायद्याचे चांगल्याप्रकारे पालन होत आहे. आज देशात निधर्मी नागरी कायदा लागू व्हावा ही मागणी आहे, असे मुख्यमंत्री डॉ. प्रमोद सावंत म्हणाले.