Goa News: तूरडाळ नासाडीप्रकरणी आठ अधिकाऱ्यांची होणार चौकशी!

Goa News: नागरी पुरवठा खात्याच्या (Civil Supplies Department) हलगर्जीपणामुळे तूरडाळ व साखरेच्या नासाडीप्रकरणी दक्षता खात्यामार्फत चौकशी सुरू झाली आहे. तूरडाळीच्या प्रकरणाला जबाबदार असलेल्या खात्याच्या तत्कालिन संचालकांसह आठजणांविरुद्ध चौकशीसाठी जबाबदारी निश्‍चित करण्यात आली आहे.

दरम्यान, यामध्ये सर्वजण राजपत्रित अधिकारी असून ताब्यात असलेल्या फाईल्समधून प्रत्येकाची या प्रकरणातील भूमिका तपासणीचे काम सुरू असल्याची खात्रीलायक माहिती मिळाली आहे. या तुरडाळीच्या चौकशीनंतर राज्य सरकारने साखरेचीही चौकशी दक्षता खात्याला करण्याचे निर्देश दिल्याने त्याचीही चौकशी सुरू झाली आहे.

तसेच, या दोन्ही प्रकरणांची वेगवेगळी चौकशी करण्यात येत असली तरी फाईल्स हाताळणारे नागरी पुरवठा खात्यातील अधिकारी तेच असल्याचा प्राथमिक निष्कर्ष काढण्यात येत आहे.

यांची नावे निश्‍चित!

नागरी पुरवठा खात्यातील संचालक सिद्धीविनायक नाईक, फ्रँकलिन फेर्रांव, विरा नायक, विल्सन फुर्तादो, दिलीप गावडे, सिव्हिया क्रास्टो, राजीव सावंत व स्नेहा गावकर या राजपत्रित अधिकाऱ्यांची भूमिका तपासून पाहण्यात येत असल्याची माहिती सूत्रांनी दिली.