बाजारात नाताळची धूम! ख्रिसमस ट्री, सजावट साहित्याची खरेदी जोरात; ग्राहकांना आकर्षित करण्यासाठी खास ऑफर

पणजी: राज्यात नाताळाची लगबग सुरू झाली असून सर्वत्र तयारी, खरेदी, रंगरंगोटी आदीची लगबग सुरू झाली आहे. नाताळासाठी लागणारे साहित्य बाजारात दाखल होऊ लागले आहे.

सजावटीचे सामान, विद्युत रोशणाईच्या माळा, ख्रिसमस ट्री, सांताचे मुखवटे, स्नोबॉल, टोप्या, तयार गोठे आणि रंगीबेरंगी नक्षत्रे, चांदण्या, गोठ्यात ठेवण्यासाठी लागणाऱ्या मूर्ती आदी साहित्य दाखल झाले असून नाताळ सणाला आता केवळ आठवडा राहिला असल्याने बाजारात साहित्य खरेदी मोठ्या प्रमाणात सुरू झाली असून पणजीतील बाजारपेठ नाताळमय झाल्याचे चित्र आहे.

गेल्या वर्षीच्या तुलनेत यंदा सजावटीच्या साहित्याच्या दरांमध्ये १० ते १५ टक्क्यानी वाढ झाली आहे. ख्रिसमस ट्री दीड हजारापासून सात हजार व त्याहून अधिक किमतीने विकल्या जात आहेत.

नक्षत्रे २५० ते हजार व त्याहून अधिक किमतीने विकली जात असून गोठ्यासाठी लागणाऱ्या मूर्त्या, विविध सजावटीचे साहित्य, ग्रीफ पॅकीट आदी विविध वस्तूंची खरेदी मोठ्या प्रमाणात होत आहे.

खास ऑफर

पणजी बाजारात मोठ्या प्रमाणात सजावट साहित्य, फटाके खरेदीची दुकाने बाजार परिसरात थाटण्यात आली आहे. दुकानदार ग्राहकांना आकर्षित करण्यासाठी, आपल्याकडे मोठ्या प्रमाणात खरेदी करावीत यासाठी ख्रिसमस ऑफर देत आहेत.

अनेक ठिकाणी आता नाताळनिमित्त मोठ्या प्रमाणात बेबिंका, दोदोल व इतर मिठाई देखील विक्रीसाठी बाजारात दाखल झाल्या असून ग्राहकांकडून त्यांच्या खरेदीला चांगला प्रतिसाद लाभत असल्याचे विक्रेते सांगतात.