Goa: केपेतील सीसीटीव्ही कॅमेरे नादुरुस्‍त

केपे : माहिती तंत्रज्ञानाच्या युगात गुन्हेगारांना पकडण्यासाठी सीसीटीव्ही कॅमेरे (CCTV Camers Not Working In Quepem-Goa) महत्त्‍वाची भूमिका बजावत असल्याने केपे बाजारात २००९ साली लोकसभा खासदार फ्रान्सिस सार्दिन यांनी खासदार निधीतून सीसीटीव्ही कॅमेरे बसवले होते. परंतु हे सीसीटीव्‍ही कॅमेरे गेल्या काही वर्षांपासून नादुरुस्त बनल्याने केपेतील सुरक्षेचा विषय ऐरणीवर आला आहे.

केपे बाजार हा तुलनेने बराच छोटा असला तरी केपे तालुका असल्याने येथे सर्व प्रमुख सरकारी कार्यालये आहेत. येथे रोज शेकडो लोक आपली कामे घेऊन येतात. अशा या प्रमुख बाजारातील एकही सीसीटीव्‍ही कॅमेरा चालत नसल्याबद्दल लोकांनी आश्चर्य व्यक्त केले आहे. खासदार सार्दिन यांनी या कॅमेऱ्यांचे उद्‍घाटन केले होते, मात्र त्यांची निगा कोण राखणार हे सांगितले नसल्याने या नादुरुस्त कॅमेऱ्यांचे कुणालाच काही पडून गेलेले नाही.

सध्या केपे पालिकेने व दक्षिण गोवा पोलिस अधीक्षक कार्यालयातर्फे कॅमेऱ्यांची देखभाल केली जात नसल्याने केपे बाजारातील व तिळामळ येथे बसवण्यात आलेले सर्व कॅमेरे पूर्णपणे नादुरुस्त बनले आहेत, तर काही कॅमेरे गायब झाले आहेत. केपेत एखादी अप्रिय घटना घडल्यास गुन्हेगारांचा शोध लावण्यास पोलिसांना बरेच प्रयत्‍न करावे लागणार असल्याने हे सीसीटीव्‍ही कॅमेरे त्वरित सुरू करावेत, अशी मागणी होत आहे.

...म्‍हणून पालिका देखभाल करत नाही

याविषयी केपे पालिकेचे अभियंता नितीन कोठारकर यांना विचारले असता, त्यांनी सांगितले, की जेव्हा कॅमेरे बसवले होते त्यावेळी केपे पालिकेद्वारे त्यांची देखरेख केली जाणार असल्याचे सांगितले होते. मात्र, या कॅमेऱ्यांचे नियंत्रण दक्षिण गोवा पोलिस अधीक्षक कार्यालयातून होत होते. वाहतूक नियम मोडणाऱ्या वाहनचालकांना दंड देण्याचे काम त्‍यांच्‍याकडून सुरू होते. याचा फायदा पालिकेला होत नसल्याने नंतर पालिकेने आपण या कॅमेऱ्यांची देखभाल करणार नसल्याचे सांगितले होते, असे कोठारकर यांनी सांगितले.