पणजी: गोव्यात कॅश फॉर जॉब घोटाळ्यात आता आणखी एका नव्या प्रकरणाची भर पडली. या प्रकरणात चक्क एका निवृत्त पोलीस उपनिरीक्षकालाच लक्ष्य करण्यात आले असून, फोंडा पोलिसांनी गुरुवारी रात्री उशिरा दोन संशयित आरोपींविरुद्ध फसवणुकीचा गुन्हा दाखल केला. आपल्या मुलाला पोलीस दलात पीएसआयची नोकरी लावून देण्याच्या बहाण्याने एका निवृत्त पोलीस अधिकाऱ्याला तब्बल 10 लाखांचा गंडा घातल्याचे समोर आले.
फोंडा पोलिसांनी फसवणुकीच्या या नवीन गुन्ह्याखाली दोन व्यक्तींवर गुन्हा नोंदवला. यामध्ये खांडेपार-फोंडा येथील रहिवासी रुपेश साखरकर आणि हळदोणा-बार्देश येथील रहिवासी टॉमी मिरांडा या दोघांचा समावेश आहे. या दोन्ही संशयितांनी मिळून तक्रारदार निवृत्त पोलीस उपनिरीक्षकाच्या मुलाला पोलीस खात्यात पीएसआय पदाची नोकरी लावून देण्याचे आमिष दाखवले होते. आपल्या मुलाचे भविष्य सुरक्षित व्हावे आणि त्याला चांगल्या पदावर नोकरी मिळावी या हेतूने या निवृत्त अधिकाऱ्याने संशयितांच्या बोलण्यावर विश्वास ठेवला.
तक्रारदार निवृत्त पीएसआयने संशयित आरोपींना मुलाच्या नोकरीच्या कामासाठी तब्बल 10 लाख रुपयांची मोठी रक्कम दिली होती. विशेष म्हणजे, हा सर्व व्यवहार पूर्णपणे कॅश स्वरुपात करण्यात आला. मात्र, पैसे देऊनही मुलाला नोकरी मिळाली नाही आणि दिलेली रक्कमही परत न मिळाल्याने अखेर आपली फसवणूक झाल्याचे लक्षात येताच त्यांनी पोलिसांत धाव घेऊन रीतसर तक्रार नोंदवली.
फोंडा (Ponda) पोलिसांनी या तक्रारीची गंभीर दखल घेत गुरुवारी रुपेश साखरकर आणि टॉमी मिरांडा यांच्याविरोधात गुन्हा दाखल केला. पोलिसांनी गुन्हा नोंदवून तपासाचे चक्र फिरवले असले, तरी या प्रकरणात अद्याप संशयित आरोपींना अटक करण्यात आलेली नाही. पोलीस या प्रकरणाचा सखोल तपास करत असून या घोटाळ्याची पाळेमुळे कुठेपर्यंत पसरली आहेत, याचा शोध घेतला जात आहे. थेट एका निवृत्त पोलीस अधिकाऱ्यालाच पीएसआय पदाचे आमिष दाखवून 10 लाखांचा गंडा घातल्याचे समोर आल्याने संपूर्ण राज्यात आणि पोलीस वर्तुळात पुन्हा एकदा खळबळ उडाली.