Vasco Carnival 2024: वास्को शहरात कार्निव्हलची धूम

Vasco Carnival 2024: ‘खा, प्या आणि मजा करा’, या किंग मोमोच्या संदेशाने वास्को शहरात आज सोमवारी मोठ्या दिमाखात व्हिवा कार्निव्हल फ्लोट परेड झाली. रंगीबेरंगी आणि आकर्षित असे 60 चित्ररथांची मिरवणूक पाहण्यासाठी लोकांनी मोठी गर्दी केली होती.

या वर्षीच्या कार्निव्हल संकल्पनेमध्ये ‘पर्यटन परंपरा आणि वारशाचा सन्मान’ यावर भर देण्यात आला. मिरवणूक सेंट ॲर्ण्डू चर्च मार्गाने सुरू होऊन स्वतंत्र पथ मार्गाने मार्गक्रमण झाल्यानंतर रेल्वे स्थानकासमोर जोशी चौकात सांगता झाली. उत्सवात सहभागी होण्यासाठी स्थानिक लोक आणि पर्यटकांची गर्दी खेचली.

वास्कोत कार्निव्हल मिरवणूक सेंट ॲण्ड्रू चर्च ते स्वतंत्र पथ या मार्गावरून काढण्यात आली. किंग मोमोकडून ''खा प्या मजा करा'', असा संदेश देण्यात आला. या चित्ररथ मिरवणुकीत सुरुवातीला नौदलाचा चित्ररथ सहभागी झाला होता. रस्त्याच्या दुतर्फा शेकडो लोकांनी गर्दी केली होती व कार्निव्हलचा आनंद लुटला.

त्यामुळे कार्निव्हलची धूम दिसून आली. पारंपरिक मार्गावरून काढण्यात आलेल्या या मिरवणुकीच्या मार्गावर मुखवटे व पताका लावून सजावट करण्यात आलेली होती. यावेळी समाज कल्याण मंत्री सुभाष फळदेसाई ,

वास्कोचे आमदार कृष्णा साळकर, मुरगावचे आमदार संकल्प आमोणकर, नगराध्यक्ष गिरीष बोरकर,कार्निव्हल समिती अध्यक्ष फ्रान्सिस्को यासह फियोला रेगो, आर्नोल्ड रेगो व इतर वास्को कार्निव्हल उत्सव समिती पदाधिकारी उपस्थित होते.

गोव्याच्या श्रीमंतांचे प्रदर्शन, सांस्कृतिक वारसा जपताना उत्साही फ्लोट्स, संगीत आणि नृत्य सादरीकरणाने वास्को शहर चैतन्यमय झाले. विशेषत: तरुणांनी उत्सवाचा पुरेपूर आनंद लुटला.

आकर्षक चित्ररथांचा सहभाग

कार्निव्हलच्या चित्ररथ मिरवणुकीत गोवा पर्यटन विभागाचा चित्ररथ, नौदलाचा चित्ररथ, गोवा पोलिस, आरोग्य विभागाच्या चित्ररथाने सहभाग दर्शवला. रेबिजमुक्त गोवा, जीसुडाचा कचरा व्यवस्थापन दर्शवणारा, पंचायत संचालनालयाचा बायोगॅसची माहिती देणारा, ड्रंक अँड ड्राईव्ह, पर्यावरणाचे रक्षण व इतर संदेश देणारे चित्ररथ मिरवणुकीत होते.