Goa Government: मोदी सरकार नव्हे, भारत सरकारच लिहा

Goa Government: म्हापसा येथील प्रशासकीय कार्यालयाबाहेर मोदी सरकार असे बॅनरे लावले आहेत. मुळात भारतीय संविधानानुसार भारत सरकार असेच कायद्याने संबोधिले किंवा लिहिले जाऊ शकते. इतर कुणाच्या नावाने किंवा मोदी सरकार असा उच्चार व प्रसिद्धी करणे,

हा संविधानाचा अपमान तसेच कायद्याचे उल्लंघन ठरते, असा दावा करीत सदर कार्यालयाबाहेरील मोदी सरकार हे बॅनर्स हटवावे, अशी मागणी युनायटेड सिटीझन ऑफ गोवा यांनी केली. यासंदर्भात या पदाधिकाऱ्यांनी सोमवारी (ता.१२) बार्देश उपजिल्हाधिकाऱ्यांना निवेदन दिले.

संजय बर्डे म्हणाले, संविधानात फक्त भारत सरकार असेच म्हणता येते. परंतु, म्हापशातील प्रशासकीय कार्यालयाबाहेर मोदी सरकार म्हणून बॅनर लावले आहेत. जे योग्य नसून, वैयक्तिकदृष्ट्या एका ठरावीक व्यक्तीची प्रसिद्धी केली जात आहे.

गोवा सरकारने हे बॅनर्स ताबडतोब हटवावेत. शंकर पोळजी म्हणाले, मोदी सरकार म्हणून बॅनर्स लावण्याचा अधिकार कुणी दिला? एक प्रकारे फक्त बॅनर्स उभारून परिसर गलिच्छ तसेच प्रदूषण केले जात आहे. एका ठरावीक व्यक्तीच्या प्रसिद्धीसाठी करदात्यांच्या पैशांचा चुराडा करणे बरोबर नाही.

मुळात पंतप्रधान मोदींवर देशाच्या सुरक्षिततेची जबाबदारी आहे. अशा प्रकारे त्यांनी स्वतःची प्रसिद्धी करू नये. त्यामुळे मोदी सरकार म्हणून लावलेले बॅनर्स हटवून तिथे भारत सरकार असाच उल्लेख करावा, अशी मागणी त्यांनी केली.