Goa Fire: कोलवाळ पुलावर कार जळाली, आगीचे कारण अस्पष्ट

Goa Fire: गोव्याहून पुण्याला जाणाऱ्या गोवा-मुंबई राष्ट्रीय महामार्गावरील धावत्या चारचाकी गाडीला सोमवारी रात्री 9.48 च्या सुमारास आग लागली.

ही घटना कोलवाळ पुलावर घडली. सुदैवाने या गाडीमधील चौघे पर्यटक बचावले.

या गाडीच्या (एमएच 20 सीएल 3905) बोनेटमधून धूर येत असल्याचे निदर्शनास येताच चालकाने प्रसंगावधान दाखवत गाडी रस्त्याच्या एका बाजूला घेतली. त्यानंतर तत्काळ अग्निशमन दलाला माहिती देण्यात आली.

मात्र जवान घटनास्थळी पोहचेपर्यंत गाडीने पेट घेतला आणि कार पूर्णतः जळाली होती. या आगीत कार मालकाचे 12 लाखाचे नुकसान झाले. ही कार प्रणव भालेराव यांच्या मालकीची होती.

हे चारही पर्यटक मूळ आंध्रप्रदेश मधील असून नोकरी निमित्त ते पुण्यात वास्तव्यास असतात. ते पुण्याहून गोव्यात पर्यनासाठी आले असता, माघारी जाताना ही दुर्घटना घडली.