Dussehra 2022: लोलयेत श्री संकर्षण देवालयात भाविकांची अलोट गर्दी!

Dussehra 2022: काणकोण लोलये पंचायत क्षेत्रातील श्री संकर्षण देवालयात दसरोत्सव साजरा करण्यात आला. नवरात्री उत्सवानिमित्त गोंधळाचा कार्यक्रम झाल्यानंतर काल दहाव्या दिवशी दसरा सण साजरा करण्यात आला. या देवालयाचा दसरोत्सव बांध संस्कृतीशी संबंधित आहे, असे येथील प्रमुख विनोद वारीक यांनी सांगितले.

वारीक, प्रभूगावकर आणि सुदीर परिवारातील घटकांची या उत्सव विधीत प्रमुख सहभाग होता. एक संकर्षण सतीचे तरंग व एक श्री निराकार देवाचे तरंग अशी दोन तरंगा या दसरोत्सवात असतात. त्याशिवाय भगत, जाण यांचाही समावेश असतो.. श्री संकर्षण देवालयात अवतार व कौल प्रसाद झाल्यानंतर दसऱ्याचा लवाजमा माशे येथील श्री निराकार देवालयात येतो.

तसेच, त्यानंतर माशे येथील पठारावर असलेल्या कडंब वृक्षाची पूजा केल्यानंतर त्याची पाने सोने म्हणून लुटण्यात येतात. ती एकमेकांना भेट म्हणून देण्याची प्रथा आहे. त्यानंतर लवाजमा वाजत गाजत माशे येथून आगसमार्गे वाजत गाजत लोलये येथील ग्रामदैवत श्री केशव देवालयात प्रवेश करतो तिथे भाविकांना कौल प्रसाद दिल्यानंतर पुन्हा लवाजमा श्री संकर्षण देवालयात येऊन विधिपूर्वक दसरोत्सवाची सांगता केली जाते.