Goa Cabinet Reshuffle: मंत्रिमंडळ फेरबदलाच्या चर्चा, गोव्यात मंत्र्यांमधील अस्वस्थता शिगेला; भाजप प्रदेशाध्यक्षांनी काय सांगितलं?

पणजी: राज्यभरात मंत्रिमंडळ फेरबदलाची चर्चा सध्या चांगलीच गाजत असून यामुळे मंत्र्यांमध्ये अस्वस्थता वाढली आहे. भाजपचे प्रदेशाध्यक्ष सदानंद शेट तानावडे यांनी मंत्रिमंडळ फेरबदल होणार असल्याचे ठामपणे सांगितल्याने या चर्चांना आणखी जोर मिळाला आहे.

सध्याच्या घडामोडींमध्ये दिल्लीतील वरिष्ठ भाजप नेते गोव्यातील मंत्र्यांच्या कामगिरीचे मूल्यमापन करणार असल्याचे समजते. या प्रक्रियेमुळे काही मंत्र्यांना त्यांच्या पदावरून पायउतार व्हावे लागण्याची शक्यता असल्याने चिंता व्यक्त केली जात आहे. सरकारच्या कामगिरीवर जनतेचा वाढता दबाव आणि आगामी निवडणुका लक्षात घेऊन हा फेरबदल होत असल्याचे मानले जात आहे.

भाजप (BJP) नेतृत्वाने यापूर्वीही मंत्रिमंडळ फेरबदलाचे संकेत दिले होते. मात्र, आता तानावडे यांच्या स्पष्ट वक्तव्यामुळे ही प्रक्रिया अटळ ठरल्याचे दिसते. राज्यातील अनेक मंत्री आपले पद टिकवण्यासाठी सक्रिय झाले असून दिल्लीच्या नेत्यांकडे आपली बाजू मांडण्यासाठी प्रयत्न करत आहेत.

याशिवाय, मंत्रिमंडळात नवीन चेहऱ्यांना संधी देण्याची शक्यता वर्तवली जात आहे. हे बदल राज्य सरकारच्या कार्यक्षमतेत सुधारणा घडवण्यासाठी आणि जनतेचा विश्वास पुन्हा संपादन करण्यासाठी महत्त्वाचे ठरू शकतात. मात्र, या संभाव्य फेरबदलामुळे सत्ताधारी गटात नाराजी निर्माण होण्याची शक्यता आहे. मंत्र्यांच्या पदांवरून होणारे बदल आगामी राजकीय समीकरणांवर मोठा परिणाम करू शकतात. त्यामुळे पुढील काही दिवस राज्यातील राजकारणासाठी महत्त्वाचे ठरणार आहेत.

तानावडे यांनी सांगितले की, मंत्रिमंडळ फेरबदल लवकरच होणार आहे. त्यांनी स्पष्ट केले की, हा फेरबदल तात्काळ होणार नाही, परंतु तो नक्कीच चर्चेत आहे. भाजप सूत्रांनी सांगितले की, काही विद्यमान मंत्र्यांचे वागणे आणि कामगिरी पक्षासाठी तसेच मुख्यमंत्री सावंत यांच्यासाठी त्रासदायक ठरत आहे. मुख्यमंत्री सावंत यांनी यापूर्वीच मंत्र्यांच्या कामकाजाचे अहवाल सादर केले आहेत. याच पार्श्वभूमीवर, फेरबदलाचा निर्णय योग्यवेळी घेतला जाईल. गेल्या वर्षी नोव्हेंबर महिन्यात मंत्रिमंडळात शेवटचा फेरबदल झाला होता, तेव्हा नुवेचे आमदार आलेक्स सिक्वेरा यांनी कुडचड्याचे आमदार नीलेश काब्राल यांची जागा घेतली होती.

फेरबदलाचा निर्णय पक्षश्रेष्ठींकडे ः तानावडे

तानावडे म्हणाले की, सध्याच्या डॉ. प्रमोद सावंत सरकारने (Government) लवकरच तीन वर्षे पूर्ण केल्यामुळे फेरबदल योग्य आहे. त्यांनी नमूद केले की, काही मंत्र्यांच्या कामकाजाबाबत पक्षात नाराजी आहे आणि त्यांच्याकडे विविध कारणांमुळे फेरबदलाची आवश्यकता आहे. मात्र, कोणाला बदलायचे हे भाजप केंद्रीय नेतृत्वाच्या निर्णयावर अवलंबून असेल.