Goa Cabinet reshuffle : गोव्यात राजकीय चर्चांना उधाण! मंत्रिमंडळात मोठा फेरबदल पण नेतृत्वावर मात्र विश्वास; नव्या चेहऱ्यांना मिळणार संधी

Major reshuffle in Goa Cabinet after Winter Session

पणजी: गेले अनेक महिने रेंगाळलेली मंत्रिमंडळ फेररचना आता २० डिसेंबरनंतर कधीही होऊ शकते, असे सत्ताधारी गोटातूनच सांगितले जात आहे. संकल्प आमोणकर, दिलायला लोबो, गणेश गावकर यांच्या नावांची चर्चा मंत्रिमंडळ प्रवेशासाठी घेतली जात आहेत. राज्यात नेतृत्व बदलाची शक्यता मात्र फेटाळण्यात आली आहे.

संसदेच्या हिवाळी अधिवेशनानंतर गोवा मंत्रिमंडळात मोठा फेरबदल होणार असल्याची चर्चा सध्या जोर धरत आहे. भाजपच्या वरिष्ठ नेत्यांकडून या गोष्टीला दुजोरा देण्यात आला आहे. मात्र, या घडामोडींच्या पार्श्वभूमीवर राज्याचे मुख्यमंत्री डॉ. प्रमोद सावंत यांच्या नेतृत्व बदलाची शक्यता फेटाळण्यात आली आहे.

२० डिसेंबरला संसदेचे हिवाळी अधिवेशन संपल्यानंतर गोवा सरकारमध्ये मंत्रिमंडळ फेरबदल होण्याची शक्यता वर्तविली जात आहे. यामध्ये काही मंत्र्यांना काढून टाकले जाणार असून, नवीन चेहऱ्यांना संधी मिळण्याची शक्यता आहे. राज्य सरकारच्या कामकाजाचा आढावा घेऊन हा निर्णय घेतला जाईल.

भाजपच्या केंद्रीय नेतृत्वाकडून राज्यातील मंत्रिमंडळ फेरबदलासंदर्भात विचारमंथन सुरू आहे. यामध्ये सध्या कामगिरी समाधानकारक नसलेल्या मंत्र्यांना काढून टाकण्याचा प्रस्ताव असून, नव्या आणि कार्यक्षम नेत्यांना मंत्रिपदाची जबाबदारी दिली जाईल. शिवाय गोव्यातील प्रादेशिक आणि सामाजिक संतुलन राखण्यासाठीही काही महत्त्वाचे निर्णय घेतले जातील.

राज्याच्या राजकीय वर्तुळात मुख्यमंत्री बदलाच्या चर्चांना उधाण आले असले, तरी भाजपच्या वरिष्ठ नेत्यांनी या शक्यतेला साफ नकार दिला आहे.

डॉ. प्रमोद सावंत यांच्या नेतृत्वाखालीच गोवा सरकार काम करत राहील, असे स्पष्ट करण्यात आले आहे. केंद्रीय नेतृत्वानेही सावंत यांच्या नेतृत्वावर विश्वास कायम ठेवला आहे.

सरकारने मागील काही महिन्यांत घेतलेल्या निर्णयांवरून काही मंत्र्यांवर टीका झाली आहे. याशिवाय, आगामी स्थानिक निवडणुकांमध्ये अधिक प्रभावी भूमिका बजावण्यासाठी भाजपकडून मंत्रिमंडळात बदल होण्याची गरज भासली आहे. लोकांच्या अपेक्षा पूर्ण करण्यासाठी कार्यक्षम नेत्यांना पुढे आणले जाण्याची शक्यता आहे.

फेरबदलात कोणाला संधी मिळेल, यावर सध्या चर्चा रंगली आहे. काही युवा नेत्यांना मंत्रिमंडळात समाविष्ट करून राज्यात नवी ऊर्जा आणण्याचा भाजपचा विचार आहे. महिलांना प्रतिनिधित्व देण्याची शक्यता असून, स्थानिक पातळीवरील लोकप्रिय नेत्यांनाही संधी मिळण्याची शक्यता वर्तवली जात आहे.

राजकीय विश्लेषकांच्या मते, आगामी विधानसभा निवडणुकांना‌ सामोरे जाण्याआधी भाजप गोव्यात आपली ताकद वाढवण्याच्या प्रयत्नात आहे. मंत्रिमंडळातील बदलांमुळे पक्षाच्या धोरणांमध्ये नवसंजीवनी येईल, असा अंदाज वर्तवला जात आहे.

गोव्यामध्ये विकासकामे जलद गतीने व्हावीत, तसेच पर्यटन आणि स्थानिक समस्या प्रभावीपणे हाताळण्यासाठी मंत्रिमंडळात नवे चेहरे आवश्यक असल्याचे मत काही तज्ज्ञांनी व्यक्त केले आहे. यामुळे सरकारला जनतेशी अधिक जवळीक साधण्याचा प्रयत्न करता येईल.

नेतृत्व डॉ. सावंतांचेच

२० डिसेंबरनंतर गोवा मंत्रिमंडळात बदल होणार, हे निश्चित मानले जात आहे. मात्र, नेतृत्व बदलाच्या चर्चांना पूर्णविराम लागला आहे. डॉ. प्रमोद सावंत यांच्या नेतृत्वाखालीच राज्य सरकार पुढे जाईल. आगामी फेरबदलातून सरकारला अधिक कार्यक्षम बनवण्याचा भाजपचा प्रयत्न आहे.