सुशेगाद पात्रांव: देवा प्रसादाची आज्ञा करा!

सुशेगाद पात्रांव

पात्रांव करामतरावांची कैफियत घेऊन मंदीरात पोहचला आहे. 'ईश्वरी आज्ञेचा आदर केला, जंगजंग पछाडून 'विलना'चे दिव्य पार पडले. काटेरी शब्दांचे क्षीर झेलले, पुन्हा नव्यानं एकनिष्ठेची शपथ घेतली. भेटीगाठीने मर्जी मिळवली तरीही 'प्रसादा'साठी एवढी उपेक्षा माझ्याच वाट्याला का?' एवढ्या माफक प्रश्नावर पात्रांव देवाशी झगडा घालतोय...

पात्रांव देवापुढे नतमस्तक झालायं...

देवा तुमचं काहीतरी चुकतयं? तुमच्या आज्ञेचा नेहमीच आदर करणाऱ्या, तुमच्याच आशिर्वादानं 'वेळोवेळी' एकनिष्ठेची शपथ घेणाऱ्या 'दृष्ट्या' नेत्याला ही उपेक्षा भोगावी लागतेय हे मला अमान्य आहे. देवा विलनाचे दिव्य केवढं भव्य होतं. त्याला लागणारा संयम, वेळ आणि बेरजेचं गणीत करताना केवढी दमछाक झाली. आणि विश्वास जिवंत ठेवण्याची रिस्क त्यांनी पत्कारली आहे. त्याची किंमत (राजकीय) त्या लाभार्थ्याला मिळायला नको? बोला देवा.. उत्तर द्या..

पात्रांव जोडलेल्या हातांनी देवापुढे गुडघे टेकतो

देवा राज्यानं करामतरावांच नेतृत्व पाहिलयं, कतृत्व पाहिलयं आणि म्हणूनच मायबाप जनतेनं पुन्हा विश्वास ठेवला. उगाच नाही लोकशाहीतील सर्वोच्च दान पदरात टाकलं? जनतेचा कौल ठरण्यापूर्वी तुमची आणि त्यांची भेट झालीच होती की. पूर्वापारचे सोबती सर्वच होते 'त्या' एकनिष्ठेच्या शपथविधीला. जनतेचा विश्वास सार्थ ठरवणे सहजशक्य नसतं परमेश्वरा, तुम्ही जाणता!

काहीतरी आठवत पात्राव भावनिक झाला

आता काही निर्णय बदलावे लागतात देवा, पण त्यापूर्वी तुमच्याशी सल्लामसलत केलीच ना. तुमच्या आज्ञेनंतरच त्यांनी 'तो' निर्णय घेतला. आणि विशेष म्हणजे गल्ली ते दिल्ली तुम्हा दोघांचीच चर्चा झाली. आता एवढी प्रसिद्धी कधी नशिबात आली होती का? बरं त्यानंतर मडगावच मैदान मारून दाखवलं की त्यांनी, आणि काय दाखला द्यावा. तुम्ही सांगा.

देवा प्रसादाची आज्ञा करा

राज्याचे प्रमुख विस्तारावर कधी बोलतच नाहीत, बोलले तर काही निष्कर्ष मिळत नाही. काही सध्या विचारात नाही, असेच म्हणतात. देवा मी संभ्रमात आहे. नुकतेच प्रभारी आले गोवा 'चार्ज' करायला. त्यांनी देखील चकार शब्द काढला नाही. उलट आम्हाला मजबूतीचे धडे देऊन गेले. देवा करामतरावांसाठी तुम्ही थोडे कष्ट घ्या... आणि तातडीने प्रसादाची आज्ञा करा......

ता.क: करामतरावांनी मडगावात नगराध्यपदाची खुर्ची मिळवली (हिसकावली) याशिवाय, नुकतेच कमकुवत झालेल्या काँग्रेसला आणखी एक धक्का दिला. नुकतेच मडगावच्या कार्यकर्ता मेळाव्यात काँग्रेसच्या माजी विभाग प्रमुखाने 2,500 हजार समर्थकांसह भाजपमध्ये प्रवेश केला.