Goa Budget Session 2023-24: या अधिवेशनात सरकारचा खरा चेहरा समोर येईल; युरी आलेमावांचा सरकारवर निशाणा

Goa Budget Session 2023-24: आजपासून गोवा विधानसभेत अधिवेशनाला सुरुवात होत आहे. मुख्यमंत्री राज्यासाठीचा अर्थसंकल्प सादर करणार आहेत. विरोधी पक्षाचे आमदार गोव्याच्या प्रश्नांवर सरकारला घेरण्यासाठी पुन्हा एकदा सज्ज झाले आहेत.

यावर विरोधी पक्षनेते युरी आलेमाव म्हणाले, “या अधिवेशनात अपयशी भाजप सरकारचा खरा चेहरा समोर येईल. भाजप सरकार फालतू खर्च कमी करण्याऐवजी अधिवेशनात कपात करत आहे, हे सिद्ध होईल."

राहुल गांधी यांना लोकसभेतून अपात्र ठरवल्याच्या निषेधार्थ जुने गोव्यातील महात्मा गांधी सर्कल येथे रविवारी झालेल्या ‘सत्याग्रहा’त आलेमाव यांनी हे वक्तव्य केले.

काँग्रेसचे प्रदेशाध्यक्ष अमित पाटकर यांनी भाजपवर विरोधकांचा गळा घोटण्याचा आणि लोकशाहीचा ऱ्हास करण्याचा प्रयत्न केल्याचा आरोप केला.

या आंदोलनात पक्षाचे पदाधिकारी आणि कार्यकर्त्यांसह राष्ट्रवादी काँग्रेसचे प्रदेशाध्यक्ष जोस फिलिप डिसोझा यांच्यासह पदाधिकारी सहभागी झाले होते. भाजपला सर्व विरोध संपवायचा आहे आणि देशातील एकमेव राजकीय पक्ष बनायचे आहे, असे पाटकर म्हणाले.

आलेमाव यांनी असेही सांगितले की, सरकारने स्वत: ची प्रशंसा करणारे कार्यक्रम आणि जाहिरातींवर खर्च केलेले कोट्यवधी आगामी विधानसभेच्या अधिवेशनात समोर येतील.

शॅक ऑपरेटर्सच्या प्रश्नांवर लक्ष वेधण्याच्या प्रस्तावाला पाठिंबा देणार असल्याचे सांगून विरोधी पक्षनेत्यांनी इतर आमदारांच्या पाठिंब्याची अपेक्षा व्यक्त केली.

मी एसटी समुदायाच्या शिष्टमंडळाला त्यांचा शैक्षणिक तसेच राजकीय आरक्षणाचा मुद्दा उचलून धरण्याचे आश्वासन दिले आहे, असे आलेमाओ म्हणाले.