अंगठ्यावर शस्त्रक्रिया करताना महिलेचा मृत्यू, पुन्हा गाजले कॅश फॉर जॉब प्रकरण; गोव्यातील ठळक बातम्या

गेल्या रविवारी झालेल्या हणजूण-कायसूव पंचायतीच्या ग्रामसभेत ध्वनिप्रदूषणाला विरोध दर्शविणारे सामाजिक कार्यकर्ते डॉ. इनासियो फर्नांडिस यांना पाचजणांनी पोलिसांसमोरच मारहाण केली होती. या प्रकरणातील संशयितांना पोलिस कधी अटक करणार, असे म्हणत आज बुधवारी समविचारी तथा समाजिक कार्यकर्त्यांच्या गटाने हणजूण पोलिसांना जाब विचारला. संशयितांना पाठिशी घातले जात असल्याचा आरोप त्यांनी केला.

२७ गणेमरड-शेल्डे (केपे) येथील सुनयना देसाई यांच्या मृत्यू प्रकरणाला ईएसआय इस्पितळाचे वैद्यकीय अधीक्षक डॉ. विश्वजीत फळदेसाई यांना दोषी धरून मडगाव पोलिसांनी त्यांच्या विरोधात भादंसंच्या ३०४ (अ) (हलगर्जीपणामुळे मृत्यू) या कलमाखाली गुन्हा नोंद केला आहे. ही दुर्घटना १५ फेब्रुवारी २०२३ रोजी घडली होती. डाव्या हाताच्या अंगठ्यावर एक छोटीशी शस्त्रक्रिया करण्यासाठी या महिलेला मडगावच्या ईएसआय इस्पितळात दाखल करण्यात आले होते. मात्र, इस्पितळात ही शस्त्रक्रिया केली जात असताना ती मृत पावली

माशेल परिसरात काही दिवसांपूर्वी एका महिलेचे मंगळसूत्र हिसकावून पळ काढलेला दुचाकीस्वार राजेश गोपीनाथ मापारी (पोंबुर्फा) याला म्हार्दोळ पोलिसांकडून अटक. आरोपीला फोंडा न्यायालयात हजर केला असता 4 दिवस पोलिस कोठडी सुनावली आहे.

खनिज वाहतुकीसंदर्भात 'सुवर्णमध्य' काढण्याची, डिचोली ट्रकमालक संघटनेची मागणी. संघटनेकडून डिचोलीच्या उपजिल्हाधिकाऱ्यांना निवेदन. आठ दिवसांपासून खनिज वाहतूक बंद असल्याने ट्रकमालक अडचणीत.

कार्डिनल फिलिप नेरी फेर्राव यांनी पोप फ्रान्सिस यांना अधिकृत निमंत्रण पाठवण्याची आशा व्यक्त केली. गोव्याच्या राज्यपालांनी पोप फ्रन्सिस यांच्या भारत भेटीसाठी केंद्र सरकारकडून अधिकृत लेखी निमंत्रण मिळवण्यात मोलाची भूमिका बजावावी अशी इच्छा त्यांनी व्यक्त केली आहे.

फोंडा येथील प्रख्यात स्त्रीरोग व प्रसूती तज्ज्ञ डॉ. जयंत कामत यांचे बुधवारी (दि. २७ नोव्हेंबर) पहाटे निधन झाले.

दीपश्री सावंत-गावासला सरकारी नोकरीचे अमिश दाखवून पैसे उकळल्या प्रकरणात पुन्हा अटक करण्यात आली असून, तिला फोंडा पोलिसांनी रिमांडसाठी न्यायालयात हजर केले आहे.

केटीसीएलने सेंट फ्रान्सिस झेवियर यांच्या शव प्रदर्शन सोहळ्यासाठी ३० नवीन बसेस मागवल्या आहेत. यात्रेकरूंसाठी पणजी,मडगाव, वास्को आणि जुने गोवा येथून सुरळीत बस सेवा मिळावी म्हणून काही बसेस आधीपासून तैनाद केल्या आहेत आणि राहिलेल्या बसेस लवकरच येतील अशी माहिती परिवहन मंत्री माविन गुदिन्हो यांनी दिली.

पणजी सीबीआय न्यायालयाने सीबीडीटीच्या आरोपी अधिकाऱ्यांना सशर्त जामीन मंजूर केला आहे. अतुल वाणी आणि पंकज कुमार या दोन्ही आरोपींना एक लाख रुपयांची लाच घेताना रंगेहात पकडण्यात आले होते.