SSC Result 2026: विद्यार्थ्यांची प्रतीक्षा संपली! दहावीच्या निकालाची तारीख जाहीर, कुठं पाहता येणार रिझल्ट?

पणजी: गेल्या अनेक दिवसांपासून गोव्यातील विद्यार्थी आणि पालक ज्या निकालाची आतुरतेने वाट पाहत होते, त्या प्रतीक्षेचा अंत अखेर झाला आहे. गोवा माध्यमिक आणि उच्च माध्यमिक शिक्षण मंडळाने (GBSHPE) मार्च २०२६ मध्ये घेतलेल्या १० वीच्या (SSC) परीक्षेचा निकाल जाहीर करण्याची अधिकृत तारीख आणि वेळ घोषित केली आहे. येत्या रविवारी, २६ एप्रिल २०२६ रोजी सायंकाळी ५:०० वाजता बोर्डाचा निकाल अधिकृत वेबसाइटवर प्रसिद्ध केला जाणार आहे.

१३ मार्च ते १९ एप्रिलदरम्यान ही परीक्षा घेण्यात आली होती. १० हजार ८१९ मुले आणि ९ हजार ८४० मुलींनी ही परीक्षा दिली आहे. गेल्या वर्षी दहावीचा निकाल ९५.३५ टक्के लागला होता. रविवारी मंडळाचे अध्यक्ष भगीरथ शेटये हे पत्रकार परिषदेत हा निकाल जाहीर करणार आहेत.

निकाल कुठे आणि कसा पाहाल?

विद्यार्थ्यांना आपला निकाल गोवा बोर्डाच्या अधिकृत वेबसाइटवर पाहता येणार आहे. निकाल पाहण्यासाठी विद्यार्थ्यांनी आपला सीट नंबर आणि जन्मतारीख तयार ठेवणे आवश्यक आहे.

याशिवाय निकाल जाहीर झाल्यानंतर काही वेळातच शाळांमध्ये निकालाचे एकत्रित पत्रक देखील उपलब्ध होईल. मोठ्या प्रमाणात ट्रॅफिकमुळे वेबसाइट संथ होऊ शकते, अशा वेळी विद्यार्थ्यांनी संयम ठेवावा, असे आवाहन बोर्डाकडून करण्यात आले आहे.