Goa BJP: भाजपमधील सुंदोपसुंदीची दिल्लीत दखल

पणजी: लोकसभा निवडणुकीत दक्षिण गोवा मतदारसंघात आलेले अपयश आणि त्यानंतर मंत्री, आमदारांच्या वक्तव्यांमुळे डागाळत गेलेल्या प्रतिमेची दखल भाजपच्या नेतृत्वाने घेतली आहे. यातून मार्ग काढण्यासाठी राष्ट्रीय स्वयंसेवक संघाची मदत घ्यावी असे दिल्लीतून सुचवण्यात आले आहे. दर दोन महिन्यांतून एकदा भाजप पदाधिकारी व संघ पदाधिकाऱ्यांची बैठक घेण्याची सूचना करण्यात आल्याची खात्रीलायक माहिती मिळाली आहे.

सूत्रांनी दिलेल्या माहितीनुसार, लोकसभा निवडणुकीपूर्वी भाजपचे प्रदेशाध्यक्ष सदानंद शेट तानावडे, मुख्यमंत्री डॉ. प्रमोद सावंत व संघाच्या पदाधिकाऱ्यांची बैठक झाली होती. त्यानंतर अशी बैठकच झालेली नाही. दिल्लीतून आता संघाचे मार्गदर्शन घेण्याची सूचना करण्यात आल्याने येत्या पंधरा दिवसांत अशी बैठक होण्याची शक्यता आहे.

सध्या चार राज्यांतील विधानसभा निवडणुकांत भाजपचे पक्षश्रेष्ठी व्यस्त असल्याने गोव्याविषयी चर्चा करण्यास ते तूर्त तयार नाहीत. त्यामुळे तूर्त संघाच्या पदाधिकाऱ्यांसोबत बैठक घ्या आणि पावले टाका असे सुचवण्यात आले आहे.

विधानसभा निवडणुकीत उमटू शकतात पडसाद

विधानसभेत सत्ताधारी आमदारांनी सरकारवर केलेली टीका, मंत्र्यांमध्‍ये उफाळून आलेले वाद, मंत्र्यांची वादग्रस्‍ते वक्तव्‍ये, विरोधकांनी धारण केलेले आक्रमक रूप या साऱ्यांबाबत दिल्लीत सध्या चिंतेचे वातावरण आहे. राष्ट्रीय माध्यमांतूनही गोव्याची प्रतिमा समोर येत आहे, ती तशीच येत राहिल्यास त्याचे पडसाद राज्यात यापुढे होणाऱ्या विधानसभा निवडणुकीत उमटू शकतील याचा अंदाज भाजपला आला आहे.