पणजी: मुंबई उच्च न्यायालयाच्या गोवा खंडपीठाने सीताराम गावकर यांना अल्पवयीन मुलीच्‍या अपहरण प्रकरणात सशर्त जामीन मंजूर केला आहे. गावकर यांच्यावर भारतीय न्यायसंहिता, बालक कायदा आणि पॉक्सो कायद्यांतर्गत गुन्हा नोंदविण्यात आला होता.
न्यायमूर्ती वाल्मिकी मेनेझिस यांनी ११ रोजी आदेश जारी केला. गावकर यांना १८ सप्टेंबर २०२४ रोजी घडलेल्या घटनेनंतर १९ सप्टेंबर २०२४ पासून कोठडीत ठेवण्यात आले होते. त्यानंतर आरोपपत्र दाखल झाल्यावर त्यांचा जामिनाचा अर्ज सत्र न्यायालयाने ९ मे २०२५ रोजी फेटाळला होता.
या खटल्यात लक्षणीय प्रगती झाली असून पॉक्सो न्यायालयाने पीडित मुलगी, तिची आई व तक्रारदार असलेले वडील यांचे साक्षीपुरावे पूर्ण केले आहेत. उर्वरित साक्षीदारांमध्ये प्रामुख्याने वैज्ञानिक तज्ज्ञ, तपास अधिकारी आणि पंच साक्षीदार यांचा समावेश आहे. मुख्य साक्षींचे जबाब पूर्ण झाल्यामुळे त्यांना धमकी दिली जाण्याचा धोका कमी असल्याचे निरीक्षण उच्च न्यायालयाने नमूद केले आहे.
सरकार पक्षाने जामिनाला विरोध करताना, हा गंभीर गुन्हा असून संशयिताने एका अल्पवयीन मुलीचे अपहरण करून तिला गोव्याबाहेर नेण्याचा प्रयत्न केल्याचा आरोप केला. तसेच यापूर्वीही त्यांच्यावर अशाच प्रकारचा गुन्हा दाखल झाल्याचा उल्लेख करण्यात आला.
मात्र, तो खटला मागे घेण्यात आला होता. न्यायालयाच्या नोंदीनुसार सध्या गावकर यांच्याविरुद्ध कोणताही प्रलंबित गुन्हा किंवा दोष सिद्ध झालेला नाही.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
