TB विरोधात लढण्यासाठी गोवा सरकार घेणार AI ची मदत, लवकर निदानासाठी होणार फायदा

TB Eradication Awareness Campaign Vishwajit Rane

पणजी: टीबी निर्मूलनासाठी गोवा राज्याने निश्‍चय मित्र उपक्रमाद्वारे स्थानिक पातळीवर नागरिकांचा सक्रिय सहभाग वाढवण्याचा प्रयत्न केला आहे. यासोबतच, संवेदनशील भागांमध्ये लक्ष केंद्रित मोहिमा, प्रसिद्ध व्यक्तींचा सहभाग आणि प्रभावी जनजागृतीचे प्रयत्न सुरू आहेत. गोव्यासारख्या छोट्या राज्याने टीबी निर्मूलनासाठी घेतलेल्या या महत्त्वपूर्ण पावलांमुळे गोवा देशातील आदर्श राज्य ठरू शकते, अशी खात्री आरोग्यमंत्री विश्‍वजीत राणे यांनी व्यक्त केली.

केंद्र सरकारच्या १०० दिवसांचे ‘टीबी निर्मूलन अभियान’ यशस्वीपणे राबवण्याच्या दिशेने गोवा महत्त्वपूर्ण पावले उचलत आहे.

नुकत्याच पार पडलेल्या राज्यातील मंत्र्यांसोबतच्या आभासी बैठकीत नड्डा यांनी राज्यस्तरापासून ग्रामपंचायत स्तरापर्यंत अभियानासाठी सर्वसमावेशक सहभाग वाढवण्याचे आवाहन केले.

राज्य पातळीवर अभियानाचे काम करत असताना गोवा खासगी-सार्वजनिक भागीदारीतून (पीपीपी) आधुनिक तंत्रज्ञानाचा उपयोग करत आहे. यामध्ये एआय-आधारित एक्स-रे स्क्रिनिंग आणि वेळेवर निदानासाठी नेट मशीनचा वापर देखील केला जात आहे. याशिवाय महिला व बालविकास विभाग व आरोग्य सेवांचे समन्वय करून अंगणवाडी सेविकांचा गोरगरिबांपर्यंत पोहोचण्यासाठी उपयोग करण्याचा अभिनव प्रस्ताव केंद्रीय मंत्री नड्डा यांनी बैठकीत मांडला.