Goa Beach Wedding: गोव्यात समुद्रकिनारी लग्नसोहळ्याचा विचार करताय? सरकारने ‘तो’ निर्णय मागे घेतला, वाचा नवीन दर

Goa Coastal Zone Management Authority Beach Wedding Fees

पणजी: गेल्या आठवड्यात गोवा सरकारने समुद्रकिनाऱ्यावर होणारे विवाह सोहळे आणि कार्यक्रमांसाठी प्रतिदिन एक लाख रुपये शुल्कवाढ करण्याचा घेतलेला निर्णय मागे घेतला. दरम्यान, सदर शुल्क वाढीसंबंधी उद्‌भवलेला घोळ टायपिंग मिस्टेकमुळे घडल्याचे स्पष्टीकरण पर्यावरणमंत्री आलेक्स सिक्वेरा यांनी दिले आहे.

त्यामुळे आता पूर्वीप्रमाणेच संपूर्ण पाच दिवसांच्या कार्यक्रमासाठी एक लाख रुपये शुल्क लागू होईल, मात्र पाच दिवसांनंतर प्रतिदिन १० हजार रुपये शुल्क आकारण्यात येणार आहे. शैक्षणिक संस्था, सेवाभावी संस्था आणि सरकारी महामंडळे यांना शुल्कात ७५ टक्के सूट मिळणार आहे.

सरकारने किनारी विवाहसोहळा तसेच इतर कार्यक्रमांसाठी दररोज लाख रुपये शुल्क परवडणारे नाही त्यामुळे ही शुल्क वाढ मागे घेण्याची गरज आहे, अशी मागणी टीटीजीचे अध्यक्ष जॅक सुखीजा यांनी केली होती.

सुखीजा यांच्या मागणीनंतर त्यावर विचारविनिमय करून शुल्क वाढीचा निर्णय तत्काळ रद्द केला. पर्यावरण खात्याने ही शुल्कवाढ करताना टीटीजीला विश्‍वासात घेतले नव्हते, त्यामुळे सुखीजा यांनी नाराजी व्यक्त केली होती.