Goa Beach: जीवरक्षकांच्या शौर्याची कमाल; 14 जणांचे वाचवले प्राण, 5 गोमंतकीयांचा समावेश

पणजी: दृष्टी मरिन या खासगी कंपनीच्या जीवरक्षकांनी समुद्रकिनाऱ्यावर आठवड्याच्या शेवटी मोठ्या दुर्घटना होण्यापासून रोखल्या. एकूण १४ जणांना बुडण्यापासून वाचवले. त्यात पाच गोमंतकीयांचाही समावेश होता.

तसेच चार जणांना प्राथमिक उपचार देण्यात आले, तर दोन हरवलेल्या बालकांना त्यांच्या कुटुंबीयांसोबत पुन्हा एकत्र करण्यात आले.बागा किनाऱ्यावर एकाच वेळी तिघांना वाचविण्यात आले.

महाराष्ट्रातील २० वर्षे वयाच्या तिघांना जीवरक्षक चंदन गिरी (रेस्क्यू बोर्ड), सौरभ कुमार, आकाश फुलकर (रेस्क्यू ट्यूब) आणि विनोद गावकर (जेट स्की) यांच्या मदतीने किनाऱ्यावर आणण्यात आले. त्याच किनाऱ्यावर मंगळूरुच्या ३८ वर्षीय पुरुषाला जीवरक्षक सुंदव सिंग यांनी वाचवले.

गोव्यातील दोन युवक (वय २८) आणि बिहारमधील ३० वर्षीय पुरुष फ्रिसबी खेळताना लाटांच्या प्रवाहात अडकले तर त्यांना जीवरक्षक भीकास वेळीप आणि शेखर वेळीप यांनी बाहेर काढले.

मांद्रे किनारी म्हापसाच्या ३० वर्षीय पुरुषासह २५ आणि २९ वर्षीय दोन महिलांना प्रबळ लाटांमुळे किनाऱ्यापासून दूर ओढले गेले. त्यांना जीवरक्षक जितान गिराप (रेस्क्यू बोर्ड) आणि विकास मसुरकर (जेट स्की) यांच्या मदतीने किनाऱ्यावर आणण्यात आले.

कळंगुट किनाऱ्यावर दोन बचावकार्य केले असून यात महाराष्ट्रातील ३० वर्षीय पुरुष आणि कर्नाटकमधील २७ वर्षीय युवकाचा समावेश आहे. तसेच कळंगुट समुद्रावर हरवलेला ८ वर्षांचा नेपाळी मुलगा कांदोळीत सापडला.

जीवरक्षक जयप्रकाश चक्रवर्ती यांनी त्याची भेट कुटुंबाशी करून दिली. कांदोळीत तामिळनाडू येथील ४० वर्षीय मद्यधुंद पुरुष समुद्रात बुडाला, जीवरक्षक विकास साळगावकर यांनी वेळीच धावून ऑक्सिजन दिला आणि कांदोळी आरोग्य केंद्रावर नेले. कोलवा, माजोर्डा आणि सिकेरी येथेदेखील बचाव मोहीम झाली आहे.