Amboli: गोव्यातील तरुणांचा आंबोलीत राडा, साईड देण्यावरुन झाला वाद; एक पोलिस जखमी

सावंतवाडी: गोव्यातून आंबोलीत पर्यटनासाठी आलेल्या तरुणामध्ये वाद झाला. साईड देण्यावरुन झालेला हा वाद सावंतवाडी पोलिस स्थानकात पोहोचला. पोलिस स्थानकांसमोर देखील तरुणांनी एकमेकांशी वाद घातला. या झटापटीत एक पोलिस कर्मचारी जखमी झाला आहे. याप्रकरणी सावंतवाडी पोलिस स्थानकात पुन्हा दाखल करण्याची प्रक्रिया रात्री उशीरापर्यंत सुरु होती.

मिळालेल्या माहितीनुसार, गोव्यातील १० ते १५ तरुणांचा ग्रुप आंबोली येथे वर्षा पर्यटनासाठी आला होता. आंबोलीच्या घाटात साईड देण्यावरुन यांच्यात वाद झाला. हा वाद अखेर सावंतवाडी पोलिस स्थानकात पोहोचला.

पोलिसांनी मध्यस्थी करुन वाद सोडविण्याचा प्रयत्न केला पण, पोलिस स्थानकासमोर देखील तरुणांची झटापटी सुरु होती. पोलिसांशी देखील तरुणांनी हुज्जत घातली. यात एक पोलिस कर्मचाऱ्याच्या खांद्याला दुखापत झाली आहे.

तरुणांविरोधात सावंतवाडी पोलिस स्थानकात गुन्हा नोंद केला जाणार आहे, रात्री उशीरापर्यंत याबाबत प्रक्रिया सुरु होती.

दरम्यान, गेल्या काही दिवसांपासून पडत असलेल्या मुसळधार पावसामुळे आंबोली धबधबा प्रवाहित झाला आहे. आंबोली धबधबा पाहण्यासाठी मोठ्या संख्येने पर्यटक सावंतवाडीत दाखल होत आहेत.