Banastarim Bridge Accident: अखेर मेघनाला अटकपूर्व जामीन

Banastarim Bridge Accident बाणस्तारी येथील कार अपघातात तिघांच्या बळी प्रकरणातील संशयित, मर्सिडीस कारची मालकीण मेघना सिनाय सावर्डेकर हिला अखेर आज (शुक्रवारी) फोंड्यातील अतिरिक्त जिल्हा व सत्र न्यायालयाने अटकपूर्व जामीन मंजूर केला.

गेल्या बुधवारी (२३ रोजी) मेघना सावर्डेकर हिच्या जामीन अर्जावरील सुनावणी शुक्रवारी निश्‍चित केली होती. या सुनावणीवेळी आज न्यायालयाने तिला अटकपूर्व जामीन मंजूर केला.

या सुनावणीवेळी अपघाताच्या तपासासाठी स्थापन केलेल्या विशेष तपास पोलिस पथकाचे प्रमुख तथा पोलिस अधीक्षक निधीन वाल्सन तसेच पोलिस निरीक्षक सूरज हळर्णकर उपस्थित होते.

याप्रकरणी कारमधील मेघना सावर्डेकर आणि तिच्या दोन मुलांनी अपघातावेळी कार परेश सिनाय सावर्डेकर हाच चालवत होता, अशी जबानी फोंडा प्रथमश्रेणी न्यायदंडाधिकाऱ्यांसमोर दिली होती. त्यामुळे मेघनाला अटकपूर्व जामीन मिळण्यात मदत झाली.

अपघातातील प्रमुख संशयित परेश सिनाय सावर्डेकर याला गुरुवारी जामीन देण्यात आला आहे. या प्रकरणाचा तपास विशेष पोलिस पथकाकडून केला जात आहे.

सरकारी वकील अनुपस्थित

बाणस्तारी अपघातातील मर्सिडीस कारची मालकीण मेघना सावर्डेकर हिच्या अटकपूर्व जामीन अर्जावर बाजू मांडण्यासाठी पोलिसांना नोटीस बजावली होती.

मात्र, या नोटिसीला पोलिसांनी आज न्यायालयात उत्तर दिले नाही तसेच त्यांची बाजू मांडण्यासाठी सरकारी वकीलही उपस्थित नव्हते.

मेघनाच्या वतीने ज्येष्ठ वकील सरेश लोटलीकर म्हणाले, तिच्यावर यापूर्वी एकही गुन्हा नोंद नाही तसेच ती स्थानिक असल्याने तिला जामीन मंजूर करावा.