बायणात आता वजनावर मिळणार मासे, संयुक्त बैठकीत निर्णय; खारीवाडा येथील पाच विक्रेत्यांची मार्केटमध्ये सोय

वास्को: बायणा येथील मासळी मार्केटात आता वजनावर मासे विकण्याची सोय करण्याचा निर्णय आमदार दाजी साळकर यांच्या अध्यक्षतेखाली झालेल्या संयुक्त बैठकीत बुधवारी घेण्यात आला.

या मार्केटात पाच मासेविक्रेते वजनावर मासे विकतील. तसेच येथे ‘वाटा’ पद्धतीने मासे विक्री करणाऱ्यांनाही जागा देण्यात येणार आहे. दरम्यान, या मार्केटाच्या एक किलोमीटर व्यासात किरकोळ मासेविक्री करणाऱ्यांविरोधात पोलिसांमार्फत कारवाई करण्याचा निर्णय झाला आहे. यामुळे आता खारीवाडा येथे घाऊक पद्धतीने होणारी मासेविक्री बंद होण्यास मदत होणार आहे.

मुरगाव पालिका मंडळाने अलीकडेच शहर भागातील नवीन मासळी मार्केट व बायणातील जुने मासळी मार्केट अधिसूचित केले आहेत. त्यामुळे या मार्केटापासून एक किलोमीटर व्यासामध्ये इतरांना मासेविक्री करता येणार नाही.

तरीही शहरातील मासळी मार्केटचे लोकार्पण झाल्यानंतर तेथे मासेविक्रेत्यांनी आपला व्यवसाय सुरू केल्यानंतरही खारीवाडा येथे घाऊक पद्धतीने मासेविक्री सुरू आहे. या कारणास्तव काही वेळा वाद होण्याच्या घटना घडल्या होत्या. त्यामुळे खारीवाडा येथील त्या मासेविक्रेत्यांची सोय बायणा येथील मासळी मार्केटात करण्यासंबंधीचा प्रस्ताव पुढे आला होता.

याप्रकरणी त्या मासेविक्रेत्यांना विश्वासात घेऊन चर्चा करण्यात आली. त्यामुळे ते बायणा मासळी मार्केटात प्रायोगिक तत्त्वावर व्यवसाय करण्यास राजी झाले आहेत. त्यामुळे पुढील रूपरेषा ठरवण्यासाठी बुधवारी सकाळी संयुक्त बैठक घेण्यात आली. याप्रसंगी आमदार साळकर, नगराध्यक्ष गिरीश बोरकर, उपजिल्हाधिकारी प्रताप गावकर, नगरसेवक फ्रेड्रिक हेन्रिक्स, यतीन कामुर्लेकर, दीपक नाईक, नारायण बोरकर, मातायिस मोंतेरो तसेच पोलिस निरीक्षक वैभव नाईक व वाहतूक पोलिस निरीक्षक रॉड्रिग्ज आदी उपस्थित होते.

खारीवाडा येथे जे मासेविक्रेते आहेत, ते किलो पद्धतीने मासेविक्री करतात. तेथे स्वस्त मासे मिळत असल्याने ग्राहकांची मोठी गर्दी होते. त्यामुळे शहरातील मासळी मार्केटातील मासेविक्रेत्यांना खारीवाडा येथे मासेविक्री करणाऱ्यांविषयी हरकत आहे. त्यामुळे पुन्हा वाद निर्माण होऊ नये यासाठी खारीवाडा येथील त्या मासेविक्रेत्यांची सोय बायणा येथील मासळी मार्केटात करण्याचा प्रस्ताव पुढे आला होता. त्या प्रस्तावावर बुधवारच्या बैठकीत चर्चा झाली.