Chlorine Gas Leak Assonora: अस्नोडा जल शुद्धीकरण प्रकल्पातून क्लोरीन गॅस गळती, सलग दुसऱ्यांदा घडली घटना

Goa Chlorine Gas Leak अस्नोडा जल शुद्धीकरण प्रकल्प केंद्रातून क्लोरीन गॅसची गळती झाल्याची धक्कादायक घटना आज दुपारच्या सुमारास घडली. प्रकल्पात असलेल्या एका सिलिंडरमधून ही गळती होत असल्याची माहिती मिळाली. सदर घटनेची माहिती मिळताच अग्निशामक दलाला कळवण्यात आले. त्यानंतर राहुल देसाई यांच्या नेतृत्वाखाली अग्निशामक दलाच्या कर्मचाऱ्यांनी घटनास्थळी तातडीने दाखल होत गॅसची गळती बंद करण्याचे प्रयत्न केले.

मात्र गळती बंद करणे अवघड असल्याचे निदर्शनास येताच खोर्ली येथील डेक्कन कंपनीच्या तज्ज्ञ व्यक्तींना आणून गॅस गळती नियंत्रणात आणण्यात आली. हे काम दुपारी ३ वाजेपर्यंत सुरु होते.

दरम्यान मागच्या आठवड्यात देखील अशाच प्रकारे क्लोरीन गॅसची गळती होत असल्याचे अग्निशामक दलाला कळवण्यात आले होते. त्यावेळी तातडीने घटनास्थळी पोहोचून अग्निशामक दलाच्या टीमने नोझल बंद केला होता.

मात्र आज पुन्हा याच केंद्रातून गॅस गळतीची घटना घडली. टनेल कॅप तुटून गॅस गळती झानी झाली असून आता कॅपवर सील मारून गळती बंद करण्यात आली असल्याचे अग्निशामक दलाकडून सांगण्यात आले आहे.