पणजी: गोव्यात सध्या सुरू असलेल्या पावसाळी अधिवेशनादरम्यान शिवोलीच्या आमदार डिलायला लोबो यांनी प्रसिद्ध शापोरा किल्ल्याच्या दुरवस्थेकडे लक्ष वेधले आणि पुरातत्व खात्याचे मंत्री सुभाष फळदेसाई यांना जाब विचारला. आमदार लोबो यांच्या मते, शापोरा किल्ला ही गोव्याची एक महत्त्वाची पुरातत्व वास्तू असून, इथे अनेक पर्यटक येतात. तरीही, २०२२ पासून त्याच्या पुनर्बांधणीचे काम सुरू झालेले नाही, ज्यामुळे पर्यटकांच्या सुरक्षिततेला धोका निर्माण होऊ शकतो.
यावर उत्तर देताना मंत्री सुभाष फळदेसाई यांनी किल्ल्याचे महत्त्व अधोरेखित करत सांगितले की, आर्थिक अडचणींमुळे काम रखडले असले तरी, आता ते सुरू आहे. त्यांनी एक महत्त्वपूर्ण घोषणा केली; किल्ल्यावरील प्रलंबित कामे पुढील १५ दिवसांत सुरू केली जातील.
सरकार शापोरा किल्ल्यावर काही मोठे बदल करणार आहे, ज्यात पर्यटकांसाठी प्रवेश शुल्क लागू करणे आणि किल्ल्याच्या आवारातील बेकायदेशीर व्यवसाय हटवणे यांचा समावेश आहे. किल्ल्याच्या पायवाटेसाठी आधीच ५.७७ कोटी रुपये खर्च झाले असून, आता पुनर्बांधणीसाठी आणखी ४ कोटी रुपये दिले जातील. ही सर्व कामे पुढील एका महिन्याच्या आत सुरू होण्याची शक्यता आहे.
मंत्री फळदेसाई यांनी प्रवेश शुल्क आणि इतर बदलांसंदर्भात लवकरच मुख्यमंत्री डॉ. प्रमोद सावंत यांच्याशी चर्चा करणार असल्याचेही स्पष्ट केले. या निर्णयामुळे किल्ल्याचे जतन होईल, पर्यटकांना चांगल्या सुविधा मिळतील आणि किल्ल्यातून सरकारला महसूलही प्राप्त होईल, अशी अपेक्षा आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.