Goa Assembly Session : कुठल्या मतदारसंघात होणार क्रिकेट स्टेडियम ? आमदार सरसावले

पणजी, गोवा क्रिकेट असोसिएशनचे आंतरराष्ट्रीय क्रिकेट स्टेडियम आता नक्की कुठे उभारावे, याचा पेच वाढण्याची शक्यता आहे. कारण सत्ताधारी गटाचे दोन आणि सरकारला पाठिंबा देणारे अपक्ष आमदार आपआपल्या मतदारसंघात क्रिकेट स्टेडियम व्हावे म्हणून पुढे सरसावले आहेत.

अनेक वर्षांपासून क्रिकेट स्टेडियमचे भिजत घोंगडे आहे. माजी मंत्री दयानंद नार्वेकर क्रिकेट असोसिएशनचे अध्यक्ष असल्यापासून क्रिकेट स्टेडियम कुठे उभारले जाणार याची उत्सुकता क्रिकेटप्रेमींना लागून राहिली, ती अजून कायम आहे.

स्टेडियमचा कोनशिला समारंभ करण्यात गोवा क्रिकेट असोसिएशनला अपयश आले आहे. नार्वेकरांनंतर चेतन देसाई, विनोद फडके, सूरज लोटलीकर अशी मंडळी अध्यक्ष होऊन गेली; पण त्यांच्या काळात स्टेडियमची केवळ घोषणा आणि चर्चाच होत राहिली.

गोवा क्रिकेट असोसिएशनचे सध्याचे अध्यक्ष विपूल फडके हे स्टेडियम उभारणीसाठी आग्रही राहिले आहेत; परंतु सध्या सत्ताधारी गटाचे आमदार प्रवीण आर्लेकर धारगळमध्ये स्टेडियम व्हावे म्हणून आग्रही आहेत.

धारगळची जमीन ही सर्वात प्रथम स्टेडियमसाठी ‘जीसीए’ने निश्चित केली होती. परंतु आता सत्ताधारी गटाचे मयेचे आमदार प्रेमेंद्र शेट यांनी मये येथे क्रिकेट स्टेडियम उभारवे म्हणून मागणी रेटली आहे. त्यापूर्वी काहीच दिवसांपूर्वी डिचोलीचे आमदार डॉ. चंद्रकांत शेट्ये यांनी म्हावळिंगे येथे स्टेडियम उभारावे म्हणून मागणी केली आहे.

‘जीसीए’ची भूमिका महत्त्वाची

तीन आमदारांनी आता क्रिकेट स्टेडियमची मागणी पुढे केल्याने सरकारसमोर निश्चित पेच असणार आहे. धारगळला स्टेडियम झाल्यास मोपा विमानतळामुळे ते विविध उपलब्धतेसाठी फायदेशीर ठरू शकते. परंतु आता डॉ. शेट्ये व शेट यांनी पर्यटनाच्या दृष्टीने डिचोली तालुक्याला या स्टेडियमचा फायदा होईल, म्हणून मागणी रेटली आहे. या मागणीमुळे सरकारलाच आता त्यावर तोडगा काढावा लागेल; परंतु त्यासाठी गोवा क्रिकेट असोसिएशनची भूमिकाही महत्त्वाची ठरणार आहे.