Goa Assembly Monsoon Session 2023: मणिपूर हिंसाचारावरून गोवा अधिवेशनात गोंधळ; सात विरोधी आमदार दोन दिवसांसाठी निलंबित

Goa Assembly Monsoon Session 2023 On Manipur Violence: मणिपूर हिंसाचारावरून गोवा पावसाळी अधिवेशनाच्या दहाव्या दिवशी सभागृहात विरोधी आमदारांनी मोठा गोंधळ घातला.

वेलमध्ये जात विरोधकांनी चर्चेची मागणी त्यानंतर आमदार जीत आरोलकर बोलत असताना त्यांना बोलू दिले नाही व घोषणा दिल्या त्यानंतर विरोधकांना मार्शलद्वारे सभागृहाच्या बाहेर काढण्यात आले.

याची गंभीर दखल घेतली असून, उद्या त्यावर निर्णय घेतला जाईल असे सभापती तवडकर म्हणाले. दरम्यान, सत्ताधारी पक्षाने तात्काळ निर्णय घेण्याची मागणी केली. त्यानंतर सभापती तवडकर यांनी सात विरोधी आमदारांना आज आणि उद्यासाठी निलंबित केले आहे.

निलंबित केलेल्या आलेल्या विरोधी पक्षातील आमदारांची नावे

विरोधी पक्षनेते युरी आलेमाव, विजय सरदेसाई, व्हेंझी व्हिएगस, वीरेश बोरकर, क्रुझ सिल्वा, कार्लुस फेरेरा, एल्टन डिकॉस्ता

सभागृहात नेमकं काय घडले?

मणिपूरमध्ये झालेल्या हिंसाचाराच्या पार्श्वभूमीवर सभागृहात आज विरोधी पक्षाच्या आमदारांनी काळे कपडे घालून निषेध व्यक्त केला. त्यानंतर शून्य प्रहरात विरोधकांनी या खासगी ठराव चर्चेसाठी घेण्यास नकार दिला.

त्यानंतर विरोधक आक्रमक झाले व सभापतीच्या वेलमध्ये जात घोषणाबाजी केली. त्यानंतर आमदार संकल्प आमोणकर यांनी त्यांचे प्रश्न मांडल्यानंतर जीत आरोलकर बोलण्यासाठी उभे राहिले.

दरम्यान, यावेळी विरोधकांनी आमदार जीत आरोलकरांना घेराव घातला आणि समर्थन देण्याची मागणी केली. विजय सरदेसाई यांनी आरोलकरांच्या माईकमध्ये मणिपूर मणिपूर अशा घोषणा दिल्या. त्यानंतर मार्शल्सच्या मदतीने सात आमदारांना सभागृहाच्या बाहेर काढण्यात आले.

तात्काळ कारवाई करण्याची सत्ताधाऱ्यांची मागणी

घडलेली घटना चुकीची असून याची गंभीर दखल घेतल्याचे सभापती रमेश तवडकर म्हणाले. याबाबत उद्या नर्णय घेतला जाईल अशी ग्वाही तवडकर यांनी दिली. मात्र, मुख्यमंत्री सावंत यांच्यासह सत्ताधारी आमदार आणि मंत्र्यांनी तात्काळ कारवाई करण्याची मागणी केली.

त्यांनंतर सभापती तवडकरांनी सात विरोधी आमदारांचे आज आणि उद्यासाठी निलंबन करण्याचा निर्णय घेतला आहे.