Nitin Gadkari In Goa: ''साखर बघितली तर चमचे आपोआप येतात...''; गोव्यात बोलताना नितीन गडकरी असं का म्हणाले?

'गोव्यात पुन्हा एकदा भारतीय जनता पक्षाचे येईल...' होय, असा विश्वास केंद्रीय रस्ते वाहतूक आणि महामार्ग मंत्री नितीन गडकरी यांनी व्यक्त केला आहे. गडकरी सध्या गोव्याच्या दौऱ्यावर आहेत. कार्यकर्त्यांच्या मेळाव्याला गडकरी संबोधित करत होते.

यावेळी त्यांनी 2027 मध्ये होणाऱ्या विधानसभा निडणुकीसाठी (Election) तयारीला लागण्याचीही कार्यकर्त्यांना सूचना केली. गोव्यात गेल्या 15 वर्षात अभूतपूर्व काम झाले आहे.

तर येणाऱ्या काळातही गोव्याला नवी उंची प्राप्त करुन देण्यासाठी आपल्याला काम करायचे आहे, असे गडकरी म्हणाले.

गडकरी यांनी आपल्या भाषणादरम्यान दिलेल्या उदाहरणाने उपस्थितांमध्ये एकच हशा पिकला. ते म्हणाले की, तुम्हाला चहा किंवा कॉफी प्यायची असेल तर साखर टाकावी लागते जोपर्यंत साखर टाकत नाही तोपर्यंत चमचा धावून येत नाही...

गडकरी म्हणाले की, राज्यात आपले पक्ष संघटन मजबूत आहे, पण ते आणखी मजबूत करण्यासाठी आपल्याला काम करायचे आहे. निवडणुकीपूर्वीच्या दोन वर्षांमध्ये आपण एक सर्व्हे केला पाहिजे, ज्यामध्ये जनतेच्या मनामध्ये आपण काय चांगलं केलं ते शोधून काढले पाहिजे.

या साऱ्या काळात जनतेची नाराजी कोणत्या कारणांसाठी आहे हेही शोधले पाहिजे. जे आपल्या समर्थनार्थ आहेत त्यांचा विश्वास मजबूत करुन जे नाराज आहेत त्यांची नाराजी दूर करुन त्यांचा विश्वास पुन्हा एकदा संपादित केला पाहिजे. हे केलं तरच नक्की 2027 मध्ये पुन्हा एकदा गोव्यात (Goa) भारतीय जनता पक्षाचे सरकार स्थापन होईल.