'पाठीत खंजीर खुपसला पण काँग्रेससोबत एकत्र लढण्यास तयार'; आप नेते पालेकरांचे काँग्रेस नेत्यांना चर्चेचे आवाहन

Goa Assembly Election 2027: आगामी विधानसभा निवडणुकीत भाजपला धडा शिकवण्यासाठी आम आदमी पक्षाने आतापासून राजकीय रणनिती आखण्यास सुरुवात केली आहे. गोवा आपचे अध्यक्ष अमित पालेकर (Amit Palekar) यांनी पुन्हा एकदा राज्यातील विरोधी पक्षातील पक्षांना एकत्र येण्याचे आवाहन केले आहे. निवडणुकीत भाजपला पराभूत करण्यासाठी आम्ही कोणाशीही युती करण्यास तयार असल्याचे पुन्हा एकदा पालेकर यांनी म्हटले.

काय म्हणाले पालेकर?

पालेकर म्हणाले की, ''आम्हाला गोव्यात भाजपला (BJP) पराभूत करायचे आहे. हे साध्य करण्यासाठी आम्ही कोणाशीही युती करण्यास तयार आहोत, परंतु ही युती निवडणुकीच्या वेळी नाही तर आताच झाली पाहिजे. 2 ऑक्टोबर रोजी एकत्र येऊया आणि राज्यात भाजपला पराभूत करण्यासाठी मोहीम सुरु करुया.''

भाजपला पराभूत करण्यासाठी सर्व विरोधकांनी गोव्‍यात एकत्र येऊन निवडणूक लढवावी, अशी मागणी लोकांकडून होत आहे. या लोकभावनेचा आदर करुन आम आदमी पार्टी तशी युती करण्‍यास तयार आहे. पण दुसऱ्या पक्षांची तशी तयारी आहे का? असा सवाल यापूर्वी बोलताना पालेकर यांनी उपस्थित केला होता.

उगाच आम्‍हाला भाजपची बी टीम म्‍हणून हिणवण्‍यापेक्षा काँग्रेसच्‍या नेत्‍यांनी युतीसाठी त्‍यांची तयारी आहे का, हे स्‍पष्‍ट करावे. जर त्‍यांना पाहिजे तर युतीची बोलणी करण्‍यासाठी मी आमच्‍या केंद्रीय नेत्‍यांना उद्याही गोव्‍यात बोलावण्‍यास तयार आहे. काँग्रेसची तशी तयारी आहे का? असेही पालेकर म्हणाले होते.

‘गोमन्‍तक टीव्‍ही’च्‍या ‘साश्‍‍टीकार’ या कार्यक्रमात बोलताना त्‍यांनी आज तुमच्‍या कार्यक्रमातून मी इतर पक्षांसमोर हा युतीचा प्रस्‍ताव मांडतो. मात्र युती करायची असेल तर ती आताच करायला पाहिजे. निवडणूक ताेंडावर येऊन शेवटच्‍या क्षणाला युती केली तर त्‍याचा काहीही फायदा होणार नाही असेही पालेकर म्हणाले होते.

गोव्‍याबद्दलचा जो काही निर्णय घ्‍यायचा आहे तो आमच्‍या केंद्रीय नेतृत्‍वाने गोवा युनिटवर सोपवला आहे. आता विराेधी पक्ष पुढे येतात की नाही ते त्‍यांनी ठरवावे, असेही शेवटी पालेकर म्हणाले.