Goa Road Accident: सहलीवरून परतणाऱ्या युवकांच्या कारचा चक्काचूर, आमठाणे -मेणकुरेदरम्यान भीषण अपघात; सुदैवाने सहाही जण सुखरूप

डिचोली: कारला झालेल्या भीषण अपघातात कारमधील सहा युवक सुदैवाने बचावले. हा अपघात बुधवारी सायंकाळी आमठाणे-मेणकूरेदरम्यान घडला. अपघात इतका भीषण होता की कारचा अक्षरशः चक्काचूर झाला. अपघातातून सुखरूप बचावलेले युवक बार्देश भागातील असल्याची माहिती मिळाली आहे.

बार्देशमधील सहा युवकांचा एक गट सहलीसाठी आमठाणे येथील फार्मवर गेला होता. तेथे मौजमजा करून सायंकाळी युवकांचा गट कारमधून आमठाणे-मेणकूरेमार्गे म्हापशाच्या दिशेने निघाला होता. आमठाणे जलाशयापासून सुमारे दोन किलोमीटर अंतरावरील एका छोट्या वळणावर हा अपघात घडला. कारचालकाचे नियंत्रण सुटल्याने कार रस्त्याच्या उजव्या बाजूला जाऊन गुलमोहराची झाडे आणि संरक्षक खांबांना धडकली. त्यानंतर कार दहा मीटर अंतरापर्यंत पलटी खात जाऊन कठड्याला अडकून थांबली.

दैव बलवत्तर म्हणून...!

अपघाताची तीव्रता आणि घटनास्थळावरील परिस्थिती पाहता कार भरधाव वेगात असल्याचा अंदाज व्यक्त करण्यात येत आहे. अपघातात पलटी होण्यापूर्वी कार विजेच्या खांबाला धडक देता-देता बचावली. त्याचवेळी समोरून दुसरे वाहन आले असते, तर मोठा अनर्थ घडला असता, अशी चर्चा घटनास्थळी सुरू होती. या भीषण अपघातातून सुखरूप बचावलेले सहाही युवक प्रचंड घाबरले होते. आमठाणे-मेणकूरेमार्गे वजरीला जोडणाऱ्या रस्त्यावर सहलीसाठी येणाऱ्या वाहनांचा वेग अनेकदा नियंत्रणाबाहेर असतो. काहीवेळा वाहनचालक मद्यधुंद अवस्थेतही वाहन चालवत असल्याने अशा अपघातांना आमंत्रण मिळते, असे स्थानिकांनी सांगितले.