Goa Agriculture : चिंचोणेत पडीक जमीन लागवडीखाली

Salcete : अधूनमधून पडत असलेल्या पावसामुळे चिंचोणे येथील सेंट सेबेस्तियान चॅपलच्या बाजूला असलेल्या शेकडो चौरस मीटर ‘पाटो’नामक शेतजमिनीत आधुनिक तंत्रज्ञानाद्वारे लागवडीला सुरुवात करण्यात आली आहे. या जमिनीत ट्रान्‍सप्लॅंटर व ट्रॅक्टरद्वारे भाताची रोपटी लावण्याचे काम सुरू करण्यात आले. याकामी चिंचोणे कृषी क्लब व कृषीतज्‍ज्ञ फा. जॉर्ज क्वाद्रोस यांची मदत घेण्यात येत आहे.

सहा ट्रान्‍सप्लॅंटर व चार ट्रॅक्टरांचा उपयोग करीत न थांबता एका दिवसात अंदाजे १.७० लाख चौरस मीटर शेतजमिनीत भाताची रोपटी लावण्याचे काम पूर्ण करण्यात आले. गतसाली चिंचोणे कृषी क्लबने सुमारे कित्येक दशके लागवड न कलेल्या दिगजम बांध शेतजमिनीत लागवडीचे काम केले व त्यामुळे हा क्लब प्रकाशझोतात आला होता. पडीक जमीन लागवडीखाली आणण्यासाठी केवळ आधुनिक तंत्रज्ञानाचा वापर शक्य आहे असे फा. क्वाद्रोस यांनी सांगितले.

कोमुनिदाद समित्यांनी शेतकऱ्यांना प्रोत्‍साहित करावे

प्रांत कृषी अधिकारी शेरीफ फुर्तादो यांनी चिंचोणे कृषी क्लब तसेच फा. जॉर्ज क्वाद्रोस यांचे कौतुक केले. त्यांचे शेतलागवडीतील यश पाहून गोव्यातील इतर कोमुनिदाद समित्यांनी आपापल्या परिसरातील शेतकऱ्यांना पडीक शेतजमीन लागवडीखाली आणण्यासाठी प्रोत्साहित केले पाहिजे असे ते म्हणाले. तर, सध्‍या आम्ही पाटो शेतजमिनीपासून सुरूवात केली आहे. बाकीची शेतजमीन लागवडीखाली आणण्यासाठी शेतकऱ्यांना मदत केली जाईल, असे चिंचोणे कृषी क्लबचे अध्यक्ष आग्नेल फुर्तादो यांनी सांगितले.