Goa Accident Death: सध्या गोव्यातील वाढते अपघात हे चिंतेचे कारण बनले आहे. अशातच पर्रा-साळगाव रस्त्यावर झालेल्या स्वयंअपघातात टॅक्सीचालक तरुणाचा जागीच मृत्यू झाला. ही दुर्घटना बुधवारी (ता. 20) पहाटे 5 वा.च्या सुमारास पर्रा-साळगाव रस्त्यावर घडली.
ताहीर खान (28, गंगानगर-खोर्ली, म्हापसा) असे अपघातात मरण पावलेल्या तरुणाचे नाव आहे. तो साळगावहून म्हापशाच्या दिशेने येत होता. ताहीर सांगोल्डामध्ये टॅक्सीचालक म्हणून कामाला होता व पहाटे कामावरून तो घरी परतत असताना ही घटना घडली.
पावसाची रिपरिप तसेच डोळा लागल्याने कदाचित ताहीरचे गाडीवरील नियंत्रण सुटून तो रस्त्याबाजूला असलेल्या गटारात पडल्याने त्याचा जागीच मृत्यू झाला असावा, असे प्रथमदर्शनी पोलिसांना वाटते. त्याच्या डोक्याला गंभीर दुखापत झाली होती. म्हापसा पोलिसांनी या घटनेचा पंचनामा करून मृतदेह उत्तरीय तपासणीसाठी गोमेकॉत पाठविला.
पांझरखण-कुंकळ्‍ळी अपघात
फातर्पा येथे आपल्या एका नातेवाईकाकडे भेट देऊन परतत असताना झालेल्या रस्ता अपघातात सां जुझे दी आरियाल येथील ब्रॅण्डन वाझ हा २८ वर्षीय युवक ठार झाला. पांझरखण-कुंकळ्‍ळी येथे रविवारी मध्यरात्रीनंतर हा अपघात झाला.
कुंकळ्‍ळी पोलिसांनी दिलेल्या माहितीनुसार, ब्रॅण्डन वाझ हा आपल्या एका नातेवाईकाला भेट देण्यासाठी फातर्पा येथे आला होता. यानंतर तो आपल्या सां जुझे दी आरियल येथील घरी परतत असताना पांझरखण-कुंकळ्‍ळी येथील महामार्गावर असलेल्या ‘रंबेल्स’वर त्याचा दुचाकीवरील तोल गेला व तो खाली कोसळला.
डोक्याला गंभीर जखम झाल्यामुळे त्याला सरकारी इस्पितळात नेण्यात आले. मात्र, उपचार चालू असताना त्याचा मृत्यू झाला. वरिष्ठांच्या मार्गदर्शनाखाली उपनिरीक्षक कविता रावत व हवालदार विनोद काणकोणकर यांनी पोलिस सोपस्कार पूर्ण केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.