Goa News: मानवी तस्करीतील ‘ती’ मुलगी मायदेशी रवाना

Goa News: मानवी तस्करीतून सुटका केलेल्या केनियातील मुलीला काल मायदेशात मोपाच्या मनोहर विमानतळावरून पाठवण्यात आले. ‘अर्ज’ या बिगर सरकारी संस्थेच्या तक्रारीवरून गेल्या वर्षी डिसेंबरमध्ये तिची सुटका करण्यात आली होती.

पोलिसांनी केंद्रीय औद्योगिक सुरक्षा दलाच्या मदतीने ही कारवाई केली. ‘अर्ज’च्या तक्रारीनंतर गेल्यावर्षी सप्टेंबरमध्ये आंतरराष्ट्रीय मानवी तस्करी रॅकेटचा भांडाफोड करण्यात आला होता.

१३ डिसेंबर रोजी केनियातील या मुलींची मुक्तता हणजुणे पोलिसांनी केली होती. ‘हवाला’ व्यवहारांचा माग काढताना या मुली पोलिसांना सापडल्या होत्या.

उपविभागीय अधिकारी या मुलींना त्यांच्या मायदेशी पाठवण्याविषयी आग्रही होते. त्यांनी ही जबाबदारी ‘अर्ज’ या संस्थेकडे सोपवली.

मोपातून मुंबई आणि मुंबईतून केनियाला जाणाऱ्या विमानात ही मुलगी बसेल याची खातरजमा करावी ही जबाबदारी अर्जकडे सोपवण्यात आली होती.

‘अर्ज’ने विमान तिकीट विकत घेतले. केंद्रीय महिला आयोगाच्या माध्यमातून केंद्रीय औद्योगिक सुरक्षा दल या मुलींच्या परत पाठवणीत मदत करेल, अशी व्यवस्था केली. पोलिसांनी एका मुलीला या दलाकडे सुपूर्द केले.

त्यानंतर मोपावरून मुंबई आणि मुंबईतून केनियात जाण्याची व्यवस्था केली. ‘अर्ज’ने ती मुलगी केनियात आपल्या घरी सुखरुप पोचल्याची खात्री केली आहे.