गिरीश चोडणकरांचा 'मुख्यमंत्र्यांना' टोला

पिसुर्ले: पर्ये मतदार संघात येणाऱ्या होंडा औद्योगिक वसाहतीत कार्यरत असलेल्या एसीजीएल कंपनीच्या कामगारांनी आपल्या हक्काच्या मागण्या कंपनी मान्य करीत नसल्याच्या निषेधार्थ साडेतीन वर्षे वाटाघाटी करून शेवटचा पर्याय म्हणून दि 18 रोजीपासून पुकारलेल्या पाच दिवसांच्या संपाला राजकीय स्तरावरून वाढता पाठिंबा मिळत असून काल तृणमूल काँग्रेस पक्षाचे नेते लुईजीन फालेरो गेल्या नंतर आज दुपारी कॉंग्रेस पक्षाचे प्रदेशाध्यक्ष गिरीश चोडणकर यांनी संपास बसलेल्या कामगारांची भेट दिली व त्यांना पक्षाच्या वतीने पुर्ण पाठिंबा व्यक्त केला आहे.

यावेळी गिरीश चोडणकर यांनी कामगारांना संबोधित करताना सांगितले की गोव्यातील जनतेचे दुर्दैव असून खाण बंदीमुळे मोठ्या प्रमाणात बेरोजगारी वाढली असताना सरकार औद्योगिक कामगारांना सुद्धा बेकारीच्या खायित लोटण्याचा प्रयत्न करीत आहे, त्यामुळे काही प्रमाणात सरकारांची भागिदारी असलेल्या या आस्थापनांमधील कामगार तीन दिवसांपासून रस्त्यावर बसले असताना सुद्धा कामगारांच्या बाबतीत असंवेदनशील बनलेल्या या सरकारने या कामगारांचा प्रश्न सोडविण्यासाठी कोणतेच प्रयत्न केले नसल्याचे स्पष्ट होत आहे.

राज्याचे मुख्यमंत्री या नात्याने त्यांच्या शेजारी मतदार संघात एवढ्या मोठ्या संख्येने कामगार हक्कांसाठी रस्त्यावर बसले असताना त्यांनी कोणतीच दखल घेतली नाही, वेळ पडल्यास मुख्यमंत्री हा प्रश्न पाच मिनिटांत सोडवू शकतात, पण कंपनीचे हीत पाहणाऱ्या मुख्यमंत्र्यां कडून हे होऊ शकत नाही त्यामुळे त्यांना मुख्यमंत्री पदी राहण्याचा कोणताच नैतिक अधिकार नाही, त्यामुळे मुख्यमंत्री डॉ प्रमोद सावंत यांनी आपल्या मुख्यमंत्री पदाचा त्वरित राजीनामा द्यावा अशी जोरदार मागणी यावेळी गिरीश चोडणकर यांनी केली आहे. यावेळी त्यांच्या समवेत राणजित राणे, वाळपई महीला कॉंग्रेस पक्षाच्या अध्यक्षा रोशन देसाई, रमेश पणसेकर कार्यकर्ते उपस्थित होते. त्यामुळे पुढच्या दोन दिवसांत या कामगारांना बराच पाठिंबा लाभणार असून, आज कामगारांनी वाळपई शहरात मोर्चा काढून आपला निषेध नोंदविला उद्या दि 21 रोजी होंडा ते साखंळी पर्यंत मोर्चा काढण्यात येणार असल्याची माहिती मिळाली आहे.