...अखेर 'भूमिपुत्र' विधेयकाविरोधातील उपोषण मागे

Mapusa: सत्तरी तालुक्यातील सामाजिक कार्यकर्ता विश्वेश प्रभू यांनी भूमिपुत्र अधिकारिणी विधेयकाच्या विरोधात केलेले उपोषण मुख्यमंत्र्यांच्या आश्वासनामुळे सातव्या दिवशी (मंगळवारी) मागे घेतले आहे.

विश्वेश प्रभू ह्याच्या नेतृत्वाखाली विशेषत: सत्तरी, बार्देश, तिसवाडी तालुका व गोव्यातील अन्य काही भागांत बैठका घेऊन त्या विधेयकाच्या विरोधात जनजागृती करण्यात आली होती. लोकांच्या जोरदार विरोधामुळे सरकार विधेयकावर माघारी आले होते तरी सरकारची ठोस भूमिका अधिकृतरीत्या जाहरी होत नसल्याचे दिसून आले होते. त्यामुळे या आंदोलनाचे प्रमुख विश्वेश प्रभू यांनी सरकार जोपर्यंत या विधानसभा अधिवेशनात स्पष्ट भूमिका जाहीर करीत नाही तोपर्यंत उपोषणास बसणार असे जाहीर करून आझाद मैदान येथे उपोषणास बसले होते.

प्रभू केलेल्या मागणीनुसार, मुख्यमंत्री डॉ. प्रमोद सावंत यांनी विधानसभेत विधेयक मागे घेत असून राज्यपालदरबारी विधेयक पाठवण्यात येणार नाही, असे जाहीर केले होते. त्या आश्वासनानंतर विश्वेश प्रभू यांनी उपोषण मागे घेतले.

शंकर पोळजी यांची पदयात्रा…

विश्वेश प्रभू ह्याच्या समर्थनार्थ सातव्या दिवशी वास्कोतील युवक शंकर पोलजी हे वास्को ते पणजी येथील आझाद मैदानापर्यंत पदयात्रा करत आले होते.

आंदोलनात अनेकांचे योगदान!

अ‍ॅड. क्लॉड आल्वारीस, शंकर पोळजी, सुदेश तिवरेकर, श्रीधर नाईक, आगुस्तिन डिकॉस्ता, झरिना, जिना परेरा, रामा काणकोणकर, जवाहरलाल शेट्ये, अ‍ॅड. अनिरुद्ध बोरकर, अ‍ॅड. सुरेश पालकर, अ‍ॅड. हृदयनाथ शिरोडकर, भारत बागकर, केनेडी आफोंन्सो, महेश म्हांबरे, रमेश गावस, शैलेंद्र वेलिंगकर, सलमान खान, किशोर राव, प्रजल साखरदांडे, गणपत झर्मेकर, सचिन मयेकर, अ‍ॅड. अमर नाईक, ऐश्वर्या साळगावकर, गाब्रियल डिकॉस्टा, आर्थर डिसिल्वा, मारियानो फेर्रांव, सबिता मास्कारेन्हास, विशांत कासार, फ्रन्की मोंतेरे, समीर वळवईकर, अविनाश जाधव व इतर भूमिपुत्रांनी या आंदोलनात सक्रिय भाग घेतला होता.