Girish Chodankar : पणजी, कुडचडेत धुळीचे साम्राज्‍य; खबरदारीचे उपाय करा

Girish Chodankar : राजधानी पणजी तसेच पर्यावरणमंत्री नीलेश काब्राल ज्या मतदारसंघाचे प्रतिनिधित्व करतात, त्या कुडचडेत सध्या धुळीचे साम्राज्य पसरले आहे. याची दखल घेऊन संबंधित अधिकाऱ्यांना खबरदारीचे उपाय योजण्यास सूचित करावे, अशी मागणी काँग्रेसचे माजी प्रदेशाध्यक्ष गिरीश चोडणकर यांनी गोवा राज्य प्रदूषण नियंत्रण मंडळाच्या सदस्य सचिवांकडे पत्राद्वारे केली आहे.

पणजी शहरासह राज्यात विविध ठिकाणी चालणाऱ्या अस्ताव्यस्त रस्ते खोदकामांमुळे सगळीकडे धूळ पसरली आहे. राजधानीची अवस्था अत्यंत वाईट आहे. पर्यावरणमंत्री काब्राल यांच्या कुडचडेतही खोदकामामुळे रस्त्यांची अवस्था वाईट बनली आहे.

रहिवासी आणि प्रवाशांची गैरसोय होत असून, त्यांना विविध समस्यांना तोंड द्यावे लागत आहे. लहान मुले आणि ज्येष्ठ नागरिकांना श्‍वसनाचा त्रास होत असल्याचे चोडणकर यांनी नमूद केले आहे.

रस्त्यावर खोदलेले खड्डे काम पूर्ण होऊनही नीट भरले जात नसल्याने रस्त्याच्या कडेला चिखल साचला आहे. धुळीचा निपटारा करण्यासाठी आवश्यक पाण्याचा शिडकावासुद्धा केला जात नसल्याचे मंडळाच्या लक्षात आणून देण्याचा प्रयत्‍न केला आहे, असे चोडणकर म्‍हणाले.