Gastroenterology In GMC : गोमेकॉत आता गॅस्ट्रोएन्टेरोलॉजी विभाग

Gastroenterology In GMC: राज्यातील जनतेला उत्तम तसेच आधुनिक आरोग्य सेवा देण्यासाठी खात्याचे प्रयत्न सुरू असून 19 डिसेंबरपूर्वी गोमेकॉत गॅस्ट्रोएन्टेरोलॉजी विभाग सुरू करण्यात येईल. तसेच गोमेकॉत लवकरच कर्करोगावरील अद्ययावत इम्युनो थेरपी सुरू होईल, अशी माहिती आरोग्यमंत्री विश्वजीत राणे यांनी दिली.

राज्य सरकारच्या वतीने प्रथमच वंधत्व निवारण आयव्हीएफ आणि आययुआय या अत्यंत महागड्या सुविधा जनतेसाठी मोफत सुरू करण्यात आल्या. या सुविधांचा शुभारंभ आरोग्यमंत्री राणे यांच्या हस्ते शुक्रवारी झाला.

यावेळी विभाग प्रमुख डॉ. केदार फडते, रुग्णालयाचे डीन डॉ. शिवानंद बांदेकर, अधिक्षक डॉ. राजेश पाटील, डॉ. म्युरेल कार्दोज, डॉ. अजित नगर्सेकर उपस्थित होते. यावेळी दहा लाभार्थ्यांना सुविधा मंजुरीची पत्रे देण्यात आली.

मंत्री राणे म्हणाले की, देशात प्रथमच या अत्याधुनिक महागड्या, आरोग्य सुविधा मोफत खुल्या करत आहोत. देशात ''दिल्ली मॉडेल''चा केवळ गवगवा आहे.

प्रत्यक्षात तिथे कोणत्या सुविधा मिळतात हे पाहावे लागेल. मात्र आम्ही अत्यंत आधुनिक अशा सर्व प्रकारच्या आरोग्य सुविधा उपलब्ध करून देत आहोत.

सध्या राज्यात पोटाच्या विकारांचे संबंधित आजार वाढत आहेत. यावर नियंत्रण आणि उपचार मिळाव्यात यासाठी जीएमसीत १९ डिसेंबर पूर्वी गॅस्ट्रोएन्टेरोलॉजी विभाग सुरू करत आहोत.

तर लवकरच कर्करोगावरील इम्युनो थेरपी सुरू होईल. यासाठी टाटा कॅन्सर रुग्णालयाशी करार झाला आहे. लवकरच या सुविधा राज्यात उपलब्ध होतील असेही ते म्हणाले.