Calangute Cylinder Blast: कळंगुटमध्ये परप्रातियांच्या झोपडपट्टीत तीन सिलिंडरचा भीषण स्फोट; पत्र्याचे शेड जमीनदोस्त

Gas Cylinder Blast At Calangute : आगरवाडा कळंगुट येथे परप्रातियांच्या झोपडपट्टीत तीन गॅस सिलिंडरचा स्फोट झाला. या स्फोटामुळे भीषण आग लागली. घटनेची माहिती मिळताच अग्निशमन दलाचे जवान घटनास्थळी दाखल झाले. या दुर्घटनेत एक नागरिक गंभीर जखमी झाला.

म्हापसा, पिळर्ण, पणजी येथील अग्निशामक दलाच्या जवानांना आगीवर नियंत्रण मिळविण्यात यश आले आहे.

याबाबत मिळालेल्या माहितीनुसार, कळंगुट आगरवाडा येथील परिसरात झोपडपट्ट्यांमध्ये परप्रांतिय राहतात. हा अपघात घडला तेथे 85 पेक्षा जास्त झोपडपट्ट्यां आहेत. यातील एका खोलीत तीन सिलिंडरचा भीषण स्फोट झाला. या अपघातानंतर एकच गोंधळ उडाला.

स्फोटाची माहिती मिळताच म्हापसा, पिळर्ण, पणजी येथील अग्निशामक दलाच्या गाड्या घटनास्थळी दाखल झाल्या. या झोपडपट्ट्यांमध्ये जाण्याचा रस्ता अडणीचा असल्याने वाट काढत अग्निशामक दलाच्या जवानांनी आगीवर नियंत्रण मिळविले.

या अपघातात एक जण भाजल्याची माहिती समोर येत आहे. जखमीला कांदोळी येथील रुग्णालयात दाखल करण्यात आले. भीषण आगीत काही झोपड्या जमीनदोस्त झाल्या.