Sonsodo Garbage Plant: सोनसडोचा कचरा पोलिस बंदोबस्तात काकोड्याला

Cacora Garbage Treatment Plant: मडगावातील सोनसडो येथील ओला कचरा उच्च न्यायालयाच्या आदेशानुसार 1 सप्टेंबरपासून काकोडा येथील कचरा प्रक्रिया प्रकल्पात नेण्याचे काम पोलिस बंदोबस्तात सुरू झाले आहे.

येथील 35 टन ओल्या कचऱ्यापैकी 20 टन कचरा काकोडा येथे नेण्यात येत असल्याची माहिती घनकचरा व्यवस्थापन महामंडळाने खंडपीठाला दिली.

या कामाचा अहवाल सादर करण्याचे निर्देश देत उच्च न्यायालयाने ही सुनावणी 11 सप्टेंबरपर्यंत तहकूब केली.

फायर हायड्रंट हवे

सोनसडो येथील कचऱ्याच्या ठिकाणी सुमारे १२ लाख रुपये किमतीच्या चार ‘फायर हायड्रंट’साठी निविदा काढली असून लवकरच ते उपलब्ध केले जातील, अशी माहिती मडगाव पालिकेने उच्च न्यायालयाला दिली.

या ठिकाणी वारंवार आगीच्या घटना घडत असल्याने तेथे अग्निशमन दलाचे पाण्याचे बंब उपलब्ध नसतात, अशी माहिती मागील सुनावणीवेळी निदर्शनास आणून देण्यात आली होती, तेव्हा न्यायालयाने मडगाव पालिकेला हे फायर हायड्रंट प्राधान्याने खरेदी करण्याचे निर्देश दिले होते.