South Goa Wine Shop Robbery: वास्कोत वाईन शॉपमध्ये चोरीचा प्रयत्न, महिलांची टोळी रेड हँड अटक

Gang of three ladies arrested in South Goa: सीसीटीव्ही फुटेजच्या आधारे वास्को पोलिसांनी सीसीटीव्हीत कैद झालेल्या तीन महिलांना बायणा येथील वाईन शॉपमधून मुलाद्वारे पैसे चोरी प्रकरणी पकडण्यात यश मिळवले. या महिला चोरांना वास्को रेल्वे स्थानकांवरून पोलिसांनी काही तासांतच अटक केली. चोरीची घटना रविवारी सकाळी 11.30 वाजता घडली.

महिला चोरट्यांकडून चोरी केलेले पैसे पोलिसांनी जप्त केले आहे. तसेच या चोरी प्रकरणात काही अल्पवयीन असल्याने त्यांना तिसवाडी येथील मेरशी अपना घरमध्ये पाठविण्यात येणार असल्याची माहिती पोलिसांनी दिली. त्यांना ताब्यात घेतल्यानंतर चौकशीत आणखी महिला आणि दोन पुरुषांची टोळी असल्याचे समोर आले.

आणखी दोन महिलांना 41 सीआरपीसी अंतर्गत पकडून अटक करण्यात आली. तीन महिलांवर भा.दं.वि. 380, 34 आयपीसी नुसार गुन्हा दाखल करण्यात आल्याची माहिती तपास अधिकारी वास्को पोलिस स्थानकाचे उपनिरीक्षक मयुर सावंत यांनी दिली.

ग्राहक बनून लुटमारी

ग्राहक बनून आलेल्या महिलांनी वाईन दुकानात येऊन बियरची मागणी केली. महिलांना बियर पाहण्याच्या निमित्ताने दुकानदाराला फ्रिजकडे खिळवून ठेवले. यापैकी एकीने मुलाला ‘आत जाऊन पैसे काढून आण’ असे मराठीतून सांगितले. ते दुकानदाराने ऐकले. याचवेळी तो मुलगा काउंटरकडे आला आणि पैसे काढायला काउंटरमध्ये हात घातला असता दुकानदाराने त्याला पकडले. मात्र, महिलांनी त्या मुलाला दुकानदारांच्या हातातून हिसकावून घेऊन पळ काढला.