Ganesh Festival in Kuwait: कुवेतमध्ये घुमला 'मंगलमूर्तीचा जयघोष', गोव्यातली यंग ब्रिगेड बाप्पाच्या सेवेत दंग

Ganesh Festival in Kuwait: आपल्या लाडक्या बाप्पाचे संपूर्ण जगभरात भक्तगण आहेत. त्याचप्रमाणे जगाच्या कानाकोपऱ्यात बाप्पाचा भक्त आपली भक्ती केल्याशिवाय राहूच शकत नाही. आपल्या गोव्याला संस्कृतीचे अनोखे वरदान लाभले आहे. तेच वरदान पिढ्यांपिढ्या तसेच जोपासलेही जात आहे. याचीच प्रचिती येते कुवेतमध्ये राहणाऱ्या गोव्यातल्या तरूणांवरून.

पक्का गोवेकर जगाच्या पाठीवर कुठेही असला तरी तो आपली चतुर्थी कधीही विसरत नाही. गोव्यातून कामानिमित्ताने मध्य आशियातील कुवेतमध्ये राहणाऱ्या पेडण्याच्या एका तरुणाने चक्क कुवेतमध्ये गणेशोत्सव साजरा करून आपल्या संस्कृतीची मूळे तिथल्या मातीतही रोवली आहेत.

पेडण्याचा रुपेश भिकाजी केरकर आणि त्यांच्या मित्रांनी कुवेतमध्ये पाच दिवसांचा गणपती बसवला आहे. यात अविनाश रेवणकर, राज परब, चेतन गुरव, मंथन उसगावकर आणि खेलन फथन या मूळ गोमंतक तरुणांची आणि कुवेतमध्ये राहणाऱ्या युवकांची साथ लाभली आहे.

कुवेत सारख्या आखाती देशात बाप्पाचा सण साजरा केला जातोय हा सध्या चर्चेचा आणि कुतूहलाचा विषय बनला आहे. आनंदाची बाब म्हणजे, अनेकजण या गणपतीच्या दर्शनाला येत असल्याचे रुपेश सांगतो.