मित्रासोबत बारमध्ये दारू पिली, नंतर खून केला अन् मोबाईल घेऊन यूपीमध्ये फरार; मित्राच्या हत्येप्रकरणी संशयिताचा जामीन अर्ज कोर्टानं फेटाळला

मडगाव: चांगल्या ब्रँडचा अँड्रॉइड मोबाईल मिळवण्यासाठी मित्राचा खून केल्याप्रकरणी संशयित प्रदीप यादव याचा जामीन अर्ज दक्षिण गोवा जिल्हा सत्र न्यायालयाने फेटाळला. न्यायाधीश राम प्रभुदेसाई यांच्या न्यायालयात सुनावणी झाली. मृत अर्जुन शर्मा (२५) आणि संशयित यादव हे उत्तर प्रदेशातील कुशीनगर परिसरातील रहिवासी असून कामानिमित्त गोव्यात राहत होते.

२०२३ मध्ये केपे तालुक्यातील पारोडा येथे ही घटना घडली होती. आरोपपत्रानुसार, महागडा मोबाईल मिळवण्याच्या उद्देशाने यादवने अर्जुनचा खून केला. घटनेनंतर त्याचा मोबाईल घेऊन तो उत्तर प्रदेशात पळून गेला. केपे पोलिसांनी तेथून त्याला अटक केली. सरकारी पक्षाने न्यायालयाला सांगितले की, खुनाच्या काही वेळ आधी अर्जुन व यादव एका बारमध्ये एकत्र दारू पीत होते. संशयिताच्या सांगण्यावरून गुन्ह्यात वापरलेली कुदळ आणि अर्जुनचा मोबाईल पोलिसांनी जप्त केला आहे.

त्यामुळे त्याचा गुन्ह्याशी प्रथमदर्शनी संबंध दिसून येतो, असा युक्तिवाद करण्यात आला. बचाव पक्षाने यादव तीन वर्षांहून अधिक काळ तुरुंगात असून १७ पैकी सात साक्षीदारांचीच साक्ष झाल्याने खटला लांबण्याची शक्यता असल्याचे सांगून जामीन मागितला. मात्र, गुन्ह्याचे गांभीर्य आणि उपलब्ध प्राथमिक पुरावे लक्षात घेऊन न्यायालयाने जामीन नाकारला.