पंतप्रधान मोदी म्हणजे सर्वांना सोबत घेऊन चालणारा विश्‍वनेता! नरेंद्र सावईकर यांचे उद्गार

फोंडा: एखाद्या सामान्य व्यक्तीकडून असामान्यत्वाकडे झेप घेताना पाहिले की, अशा व्यक्तीचा आदर्श हा समाजात रूजावा असे वाटते, आणि त्यादृष्टीने देशाचे पंतप्रधान हे आजच्या युवा वर्गासाठी आदर्श आहेत, असे उद्गार माजी खासदार तथा अनिवासी भारतीय आयुक्त ॲड. नरेंद्र सावईकर यांनी काढले.

फर्मागुढी - फोंड्यात काल फोंडा शिक्षण संस्थेच्या बांदेकर फार्मसी महाविद्यालयात पंतप्रधान नरेंद्र मोदी यांच्या जीवनावर आर. बालसुब्रमण्यम यांनी लिहिलेल्या ‘पावर विदीन...‘ या पुस्तकावर चर्चा कार्यक्रम आयोजित करण्यात आला होता.

यावेळी विद्यार्थ्यांची मोठी उपस्थिती होती. या कार्यक्रमाला फोंड्याचे आमदार तथा कृषीमंत्री रवी नाईक, अनिवासी भारतीय आयुक्त नरेंद्र सावईकर, फोंडा शिक्षण संस्थेचे सचिव तथा नगरसेवक रितेश नाईक, संयोजक गोरख मांद्रेकर, प्राचार्य विकास पिसुर्लेकर तसेच प्रा. रसिका गावकर व प्रा. पद्मजा कामत आदी मान्यवर व्यासपीठावर होते.

नरेंद्र सावईकर म्हणाले की, पंतप्रधान मोदी यांच्या कारकिर्दीचा ठसा देशाच्या राजकारणावर आणि समाजकारणावर उमटला आहे. सर्वांना सोबत घेऊन चालणारा हा विश्‍वनेता आहे. फोंड्याचे आमदार रवी नाईक यांची राजकारणातील गरुडभरारी पाहता असामान्यत्वाकडे झेप घेणारा हा गोव्यातील नेता आहे, हे कुणीही मान्य करील.

त्यामुळे एखाद्या नेत्याचा आदर्श घेताना त्याने देशासाठी काय केले, याचा आलेख युवकांपुढे ठेवावा, असे आवाहन सावईकर यांनी केले. ॲड. सतीश पिळगावकर यांनी सूत्रसंचालन केले तर प्रास्ताविक गोरख मांद्रेकर यांनी केले. प्रा. रसिका गावकर, प्रा. पद्मजा कामत यांनी पुस्तकावर भाष्य केले.